అమెజాన్‌ ప్రైమ్‌ వీడియో

దిల్లీ: అంతర్జాతీయంగా అత్యంత వేగంగా వృద్ధి చెందుతున్న విపణుల్లో భారత్‌ ఒకటని అమెజాన్‌ ప్రైమ్‌ వీడియో తెలిపింది. స్థానిక భాషల్లో మరింత కంటెంట్‌ రూపొందించేందుకు పెట్టుబడులు కొసాగిస్తామని, దేశంలో మరింత మందికి చేరువకావడమే లక్ష్యమని అమెజాన్‌ ప్రైమ్‌ వీడియో ఇండియా డైరెక్టర్‌, కంట్రీ జనరల్‌ మేనేజర్‌ గౌరవ్‌ గాంధీ పేర్కొన్నారు.  భారత వినియోగదారుల కోసం మొబైల్‌లో మాత్రమే వినియోగించుకునే విధంగా ఎయిర్‌టెల్‌తో కలిసి అమెజాన్‌ ప్రైమ్‌ సరికొత్త పథకాన్ని ప్రవేశపెట్టిన విషయం తెలిసిందే. ‘గత నాలుగేళ్లుగా దేశంలో స్థిరంగా వృద్ధిచెందుతున్నాం. దేశంలో 4300కు పైగా నగరాలు, పట్టణాల్లో అమెజాన్‌ ప్రైమ్‌ వీడియోలను వీక్షిస్తున్నారు. 10 భాషల్లో సొంత నిర్మాణం, చిత్రాలపై పెట్టుబడులు ఇందుకు దోహదపడుతున్నాయి’ అని గాంధీ వెల్లడించారు.