UP: 35కు చేరిన కల్తీ మద్యం మృతులు

తాజా వార్తలు

Updated : 29/05/2021 16:00 IST

UP: 35కు చేరిన కల్తీ మద్యం మృతులు

చికిత్స పొందుతూ మరో 24 మంది మృతి

అలీగఢ్‌: ఉత్తర్‌ప్రదేశ్‌లోని కర్సువాలో కల్తీ మద్యం తాగి మృతి చెందినవారి సంఖ్య 35కు చేరింది. చికిత్స పొందుతున్న మరికొందరి పరిస్థితి విషమంగా ఉందని..మృతుల సంఖ్య పెరిగే అవకాశం ఉన్నట్లు అధికారులు పేర్కొంటున్నారు. అలీగఢ్‌ పరిధిలోని కర్సువా ప్రాంతంలోని ప్రభుత్వం ఆమోదం పొందిన రెండు దుకాణాల్లో మద్యం కొని సేవించిన పలువురు అస్వస్థకు గురయ్యారు. పరిస్థితి విషమించి ఇప్పటివరకు 35 మంది మృతి చెందారు. ఈ మరణాలపై యూపీ ప్రభుత్వం దిగ్భ్రాంతి వ్యక్తం చేసింది. విధి నిర్వహణలో అలసత్వం వహించిన జిల్లా ఎక్సైజ్‌ అధికారితోపాటు, మరో ఐదుగురు అధికారులను సస్పెండ్‌ చేసింది. 

కల్తీ మద్యం తాగి ఇద్దరు మృతి చెందినట్లు, పలువురు అస్వస్థకు గురైనట్లు లోధా పోలీసులకు శుక్రవారం తొలుత ఫిర్యాదు అందింది. ఘటనా ప్రాంతానికి చేరుకొని విచారణ చేపట్టగా.. కర్సువా గ్రామంతోపాటు పరిసర 3 గ్రామాల్లో మొత్తం 11 మంది మృతి చెందినట్లు తేలింది. ఆయా గ్రామాలకు అదనపు పోలీసు సిబ్బంది చేరుకొని మృతదేహాలను పోస్టుమార్టం నిమిత్తం తరలించారు. అస్వస్థకు గురైన పలువురిని ఆసుపత్రుల్లో చేర్చారు. కాగా అందులో శుక్రవారం ఐదుగురు, శనివారం మరో 19 మంది చికిత్స పొందుతూ మృతి చెందారు. మరికొందరు కంటిచూపు కోల్పోయినట్లు తెలుస్తోంది.

విచారణ చేపట్టిన పోలీసులు కల్తీ మద్యం విక్రయించిన రెండు దుకాణాలను సీజ్‌ చేసి, పరీక్షల కోసం మద్యం నమూనాలను సేకరించినట్లు వెల్లడించారు. ఈ కేసులో ఇప్పటివరకు ఆరుగురు నిందితులను అరెస్టు చేసినట్లు పోలీసులు తెలిపారు. మద్యం విక్రయించిన ఇద్దరు ప్రధాన నిందితులు పరారీలో ఉన్నట్లు పేర్కొన్నారు. వారిపై రూ.లక్ష రివార్డును ప్రకటించినట్లు తెలిపారు.


Advertisement

Tags :

మరిన్ని

జిల్లా వార్తలు
బిజినెస్
మరిన్ని
సినిమా
మరిన్ని
క్రీడలు
మరిన్ని
పాలిటిక్స్
మరిన్ని
జనరల్
మరిన్ని
జాతీయ- అంతర్జాతీయ
మరిన్ని