Afghanistan: మసీదులో భారీ పేలుడు.. 46మంది మృతి!

తాజా వార్తలు

Updated : 09/10/2021 17:01 IST

Afghanistan: మసీదులో భారీ పేలుడు.. 46మంది మృతి!

కాబుల్‌: తాలిబన్ల పాలనలో ఉన్న అఫ్గానిస్థాన్‌ మరోసారి దాడులతో దద్దరిల్లింది. ఉత్తర అఫ్గానిస్థాన్‌ కుందుజ్‌ ప్రావిన్స్‌ ప్రాంతంలోని ఓ మసీదులో శక్తిమంతమైన పేలుడు సంభవించింది. ఈ దుర్ఘటనలో కనీసం 46మంది వరకు దుర్మరణం చెందగా.. అనేకమంది గాయపడినట్టు పోలీసులు వెల్లడించారు. శుక్రవారం మధ్యాహ్నం వందలాది మంది ముస్లింలు ప్రార్థనలు చేసుకుంటున్న సమయంలో ఖాన్‌ అబాద్‌ ప్రాంతంలోని షియాల మసీదును లక్ష్యంగా చేసుకొని ముష్కరులు ఈ దాడికి పాల్పడ్డారు. భారీ పేలుళ్ల ధాటికి పెద్ద శబ్దాలు వినిపించినట్టు ప్రత్యక్ష సాక్షులు తెలిపారు. ఈ మారణకాండతో మసీదులో ఎక్కడ చూసినా చెల్లాచెదురుగా పడి ఉన్న మృతదేహాలు.. క్షతగాత్రుల హాహాకారాలతో ఆ ప్రాంతమంతా భీతావహ వాతావరణం నెలకొంది.

దీనిపై తాలిబన్ల ముఖ్య అధికార ప్రతినిధి జాబిహుల్లా ముజాహిద్‌ స్పందించారు. షియాల మసీదును లక్ష్యంగా చేసుకుని జరిపిన ఈ దాడిలో పెద్ద సంఖ్యలో మరణాలు సంభవించినట్టు వెల్లడించారు. అనేక మంది గాయాలపాలైనట్టు తెలిపారు. తాలిబన్ల ప్రత్యేక బలగాలు ఘటనా స్థలానికి చేరుకున్నాయన్నారు. ఈ ఘటనపై దర్యాప్తు జరుగుతోందని చెప్పారు. క్షతగాత్రులను ఆస్పత్రులకు తరలించినట్టు తెలిపారు. ఈ దాడికి బాధ్యత వహిస్తూ ఇప్పటి వరకు ఏ ఉగ్రవాద సంస్థా ప్రకటించలేదు. అఫ్గానిస్థాన్‌ను తాలిబన్లు హస్తగతం చేసుకున్న తర్వాత అక్కడ ఇస్లామిక్‌ స్టేట్‌ ముఠా దాడులు పెరుగుతున్నట్లు అంతర్జాతీయ నివేదికలు వెల్లడిస్తున్నాయి. గతంలో కూడా అనేకసార్లు షియాలపై ఇస్లామిక్‌ స్టేట్‌ మిలిటెంట్లు దాడిచేసిన సందర్భాలు అనేకం ఉన్నాయి.


Advertisement

Tags :

మరిన్ని

జిల్లా వార్తలు
బిజినెస్
సినిమా
మరిన్ని
క్రీడలు
మరిన్ని
పాలిటిక్స్
మరిన్ని
జనరల్
మరిన్ని
జాతీయ- అంతర్జాతీయ
మరిన్ని