21న రేషన్‌ పంపిణీవాహనాల ప్రారంభం

వాహనాలను పరిశీలిస్తున్న ఇన్‌ఛార్జి జిల్లా పాలనాధికారి మార్కండేయులు

చిత్తూరు(మిట్టూరు): ఇంటికే రేషన్‌ పంపిణీ కోసం సిద్ధం చేసిన వాహనాలను ఈ నెల 21న చిత్తూరులో ప్రారంభించనున్నామని ఇన్‌ఛార్జి జిల్లా కలెక్టర్‌ మార్కండేయులు పేర్కొన్నారు. స్థానిక బీఎస్‌ కణ్ణన్‌ జూనియర్‌ కళాశాల మైదానంలో నిర్వహిస్తోన్న వాహనాల రిజిస్ట్రేషన్‌ను ఆదివారం ఆయన పరిశీలించారు. ఆయన మాట్లాడుతూ ప్రభుత్వం జిల్లాకు కేటాయించిన 724 వాహనాల్లో ఇప్పటికి 669 వచ్చాయన్నారు. మిగిలినవి సోమవారం వస్తాయని చెప్పారు. కేవలం పాతిక వాహనాలకే రిజిస్ట్రేషన్‌ పూర్తవడంపై అసంతృప్తి వ్యక్తం చేశారు. ఇంటికే రేషన్‌ పంపిణీ, ముందస్తు సమాచారం తదితర అంశాలను ఇన్‌ఛార్జి కలెక్టర్‌కు పౌరసరఫరాల సంస్థ డీఎం సోమయాజులు వివరించారు. అనంతరం ట్రయల్‌ రన్‌ నిర్వహించారు.

నాణ్యమైన బ్యాగులనే అందజేయాలి

కార్డుదారులకు నాణ్యత కలిగిన బ్యాగులనే అందజేయాలని మార్కండేయులు ఆదేశించారు. 10, 15 కిలోల బ్యాగులను కార్డుదారులకు అందజేస్తామని, 13లక్షల 10 కిలోల బ్యాగులకు గాను.. 10లక్షలు, 4.80లక్షల 15 కిలోల బ్యాగులకు గాను.. మూడు లక్షల బ్యాగులు చేరాయని చెప్పారు. వాటి నాణ్యత, మిషన్‌కుట్లను పరిశీలించి కుట్లు సక్రమంగా లేకపోవడంపై అసంతృప్తి వ్యక్తం చేశారు. ఆయన వెంట డీఎస్‌వో శివరామప్రసాద్‌, సహాయ మేనేజరు త్యాగరాజులు, అధికారులు సిబ్బంది ఉన్నారు.