close

తాజా వార్తలు

Published : 17/03/2020 09:24 IST
Facebook Share Twitter Share WhatsApp Share Telegram Share

ఎన్నేళ్లకెన్నేళ్లకు వస్తున్నారమ్మా..!

రీ ఎంట్రీ ఇస్తున్న ఒకప్పటి బ్యూటీలు

ఒకప్పుడు తెలుగు వారిని అలరించి కనుమరుగైన ముద్దుగుమ్మలు ఇప్పుడు మళ్లీ మన తెరపై తళుక్కుమనబోతున్నారు. సరైన కథతో రీ ఎంట్రీ ఇవ్వడానికి సిద్ధమయ్యారు. శ్రుతి హాసన్‌, ప్రియమణి, అంజలి, అమలాపాల్‌ తదితరులు చాలా రోజుల విరామం తర్వాత టాలీవుడ్‌ సినిమాకు సంతకం చేశారు. ఒకప్పుడు ఫాంలో ఉన్న వీరు విరామం తర్వాత నటిస్తుండటంతో ప్రేక్షకుల్లో ఆసక్తి నెలకొంది. మరి వీరు అంచనాల్ని ఏ మాత్రం అందుకుంటారో చూడాలి.

శ్రుతి హాసన్‌

విలక్షణ నటుడు కమల్‌ హాసన్‌ కుమార్తెగా అందరికీ పరిచయమైనా టాలీవుడ్‌లో తనకంటూ గుర్తింపు తెచ్చుకున్నారు శ్రుతి హాసన్‌. ‘గబ్బర్‌ సింగ్‌’, ‘రేసుగుర్రం’, ‘శ్రీమంతుడు’, ‘ప్రేమమ్‌’ వంటి హిట్లు అందుకున్నారు. 2017లో వచ్చిన పవన్‌కల్యాణ్‌ ‘కాటమరాయుడు’ తెలుగులో ఆమె చివరి సినిమా. దీని తర్వాత సినిమాలకు దూరంగా ఉన్న ఆమె మూడేళ్ల తర్వాత ఓ చిత్రానికి సంతకం చేశారు. రవితేజ కథానాయకుడిగా నటిస్తున్న ‘క్రాక్‌’ సినిమాలో ఆమె కథానాయికగా కనిపించబోతున్నారు. గోపీచంద్‌ మలినేని దర్శకత్వం వహిస్తున్న ఈ సినిమాను మేలో విడుదల చేయడానికి సన్నాహాలు చేస్తున్నారు.

ప్రియమణి

‘పెళ్లైన కొత్తలో’, ‘యమదొంగ’, ‘శంభో శివ శంభో’, ‘గోలీమార్‌’, ‘రగడ’ వంటి హిట్స్‌లో సందడి చేసిన భామ ప్రియమణి. 2013లో వచ్చిన ‘చండీ’లో చివరిసారి తెలుగు తెరపై కనిపించారు. ఆపై 2016 ప్రకాష్‌రాజ్‌ ‘మన ఊరి రామాయణం’లో ప్రత్యేక పాత్రలో మెరిశారు. ఇన్నేళ్లకు తెలుగులో ‘విరాటపర్వం’ సినిమాకు సంతకం చేశారు. అంతేకాదు తమిళనాడు దివంగత ముఖ్యమంత్రి జయలలిత బయోపిక్‌ ‘తలైవి’లోనూ నటిస్తున్నారు. వెంకటేష్‌ కథానాయకుడిగా నటిస్తున్న ‘నారప్ప’లో కథానాయిక పాత్ర కోసం ప్రియమణిని సంప్రదించినట్లు సమాచారం. దీనిపై చిత్ర బృందం స్పందించాల్సి ఉంది.

అంజలి

కోలీవుడ్‌తోపాటు టాలీవుడ్‌లోనూ రాణిస్తున్న బ్యూటీ అంజలి. ‘సీతమ్మవాకిట్లో సిరిమల్లెచెట్టు’, ‘బలుపు’, ‘గీతాంజలి’, ‘డిక్టేటర్‌’ వంటి సినిమాల్లో సందడి చేశారు. 2017 ‘చిత్రాంగద’ తర్వాత నేరుగా తెలుగు సినిమా చేయలేదు. ఇన్నాళ్లకు ‘నిశ్శబ్దం’తో ప్రేక్షకుల ముందుకు రాబోతున్నారు. ఈ సినిమాలో అంజలి పోలీసు అధికారిగా కనిపించబోతున్నారు. ఈ మధ్య ఆమె పాత్రల కోసం జిమ్‌లో కసరత్తులు చేసి నాజూకుగా తయారయ్యారు. అదేవిధంగా ‘ఆనంద భైరవి’లో నటిస్తున్నారు. పవన్‌ కల్యాణ్‌ ‘వకీల్‌ సాబ్‌’లో కీలక పాత్ర పోషిస్తున్నారు. బాలకృష్ణ 106వ సినిమాలోనూ అంజలి నటించబోతున్నట్లు సమాచారం.

అమలాపాల్‌

విభిన్న కథలతో ప్రేక్షకుల్ని మెప్పించే ప్రయత్నం చేస్తున్నారు అమలాపాల్‌. ఆమె కెరీర్‌ మాలీవుడ్‌లో మొదలైనప్పటికీ కోలీవుడ్‌, టాలీవుడ్‌లోనూ రాణించారు. ఇక్కడ ‘బెజవాడ’తో నటిగా అరంగేట్రం చేశారు. ఆపై ‘లవ్‌ ఫెయిల్యూర్‌’, ‘నాయక్‌’, ‘ఇద్దరమ్మాయిలతో..’, ‘జెండాపై కపిరాజు’ సినిమాల్లో నటించారు. దీని తర్వాత ఆమె తమిళ సినిమాలు తెలుగులో డబ్‌ అయ్యాయి. కానీ 2015 నుంచి అమలాపాల్‌ టాలీవుడ్‌లో సంతకం చేయలేదు. ఇన్నేళ్లకు ఇటీవల ఓ ప్రాజెక్టుకు గ్రీన్‌ సిగ్నల్‌ ఇచ్చారు. నెట్‌ఫ్లిక్‌ సిరీస్‌ ‘లస్ట్‌ స్టోరీస్‌’ను తెలుగులో రీమేక్‌ చేస్తున్నారు. ఇందులో అమలాపాల్‌ ప్రధాన పాత్ర పోషిస్తున్నారట. మొదటి భాగానికి నందిని రెడ్డి దర్శకత్వం వహిస్తున్నట్లు గుసగుసలు వినిపిస్తున్నాయి. మిగిలిన భాగాల్ని తరుణ్‌ భాస్కర్‌, సంకల్ప్‌ రెడ్డి, సందీప్‌రెడ్డి వంగా డైరెక్ట్‌ చేయనున్నట్లు వార్తలు వస్తున్నాయి. ఈ ప్రాజెక్టుపై పూర్తి స్పష్టత రావాల్సి ఉంది.

కత్రినా కైఫ్‌

బాలీవుడ్‌ సుందరి కత్రినా కైఫ్‌ ‘మల్లీశ్వరి’ సినిమాతో తెలుగు వారికి దగ్గరయ్యారు. 2005లో బాలకృష్ణ ‘అల్లరి పిడుగు’లో నటించారు. ఆపై హిందీ సినిమాలతో బిజీగా గడిపిన కత్రినా ఇన్నాళ్లకు తెలుగు సినిమాకు సంతకం చేసే అవకాశాలు ఉన్నట్లు తెలుస్తోంది. ప్రభాస్‌ 21వ చిత్రానికి నాగ్‌ అశ్విన్‌ దర్శకత్వం వహించబోతున్నారు. కమర్షియల్‌ డ్రామాగా రూపొందించబోతున్న ఈ సినిమాలో ప్రభాస్‌ సరికొత్త పాత్రలో కనిపించబోతున్నారట. వైజయంతి మూవీస్‌ పతాకంపై అశ్వినిదత్‌ నిర్మించబోతున్నారు. ఇందులో కథానాయిక పాత్ర కోసం కత్రినా కైఫ్‌ను అనుకుంటున్నట్లు వార్తలు వస్తున్నాయి. ఈ ప్రచారం నిజమైతే ఇది కత్రినా రీఎంట్రీ అవుతుంది.

-ఇంటర్నెట్‌డెస్క్‌ ప్రత్యేకం


Tags :

బిజినెస్‌

రాజకీయం

జనరల్‌

సినిమా

క్రైమ్

స్పోర్ట్స్

జాతీయ-అంతర్జాతీయ

జిల్లా వార్తలు
సినిమా
మరిన్ని

దేవతార్చన

+

© 1999- 2020 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact :
040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.