Covid: ప్లాసిబో ముందు అజిత్రోమైసిన్‌ దిగదుడుపే 

తాజా వార్తలు

Updated : 20/07/2021 14:00 IST

Covid: ప్లాసిబో ముందు అజిత్రోమైసిన్‌ దిగదుడుపే 

 తాజా అధ్యయనంలో వెల్లడి

లాస్‌ ఏంజెలెస్‌: ఇళ్లలో ఉంటూ, కొవిడ్‌ చికిత్స పొందే వారికి ప్లాసిబో కంటే అజిత్రోమైసిన్‌ ఏమాత్రం ప్రభావవంతం కాదని తాజా అధ్యయనం పేర్కొంది. ఈ యాంటీబయోటిక్‌ ఔషధం కారణంగా కొవిడ్‌ బాధితులు ఆసుపత్రులకు వెళ్లాల్సిన అవసరం ఏర్పడవచ్చని హెచ్చరించింది! కాలిఫోర్నియా, స్టాన్‌ఫోర్డ్‌ విశ్వవిద్యాలయాల పరిశోధకులు చేపట్టిన ఈ అధ్యయన వివరాలను అమెరికన్‌ మెడికల్‌ అసోసియేషన్‌ పత్రిక అందించింది. ఇప్పటివరకూ ఆసుపత్రుల్లో కోలుకుంటున్న కొవిడ్‌ బాధితులకు అజిత్రోమైసిన్‌ ఇవ్వడంపై కొన్ని పరిశోధనలు జరిగాయి. అయితే తొలిసారిగా- ఇళ్లలో కోలుకుంటున్న మొత్తం 263 మంది మహమ్మారి బాధితుల ఆరోగ్య పరిస్థితిని శాస్త్రవేత్తలు అధ్యయనం చేస్తూ వచ్చారు. వీరిలో 171 మందికి 1.2 గ్రాముల అజిత్రోమైసిన్‌ సింగిల్‌ డోసు; 92 మందికి ప్లాసిబో మాత్రలను అందించారు. 14 రోజుల తర్వాత వీరిలో సగం మందికి నెగెటివ్‌ ఫలితం వచ్చింది. కరోనా లక్షణాలు పూర్తిగా తగ్గిపోయాయి. అయితే, 21వ రోజు నాటికి అజిత్రోమైసిన్‌ తీసుకున్నవారిలో 5% మంది ఆసుపత్రిలో చేరాల్సి వచ్చింది. ప్లాసిబో మాత్రలు వేసుకున్నవారిలో ఒక్కరు కూడా ఆసుపత్రికి వెళ్లాల్సిన అవసరం రాలేదు.

‘‘ప్లాసిబోతో పోల్చితే సింగిల్‌ డోసు అజిత్రోమైసిన్‌ వల్ల కొవిడ్‌ బాధితులకు పెద్ద ఉపశమనం ఉండటం లేదని గుర్తించాం. ఆసుపత్రి వెలుపల చికిత్స పొందే కొవిడ్‌ బాధితులకు అజిత్రోమైసిన్‌ ఇవ్వడాన్ని అధ్యయనం సమర్థించడం లేదు. కరోనా బాధితులకు దీన్ని వీలైనంత త్వరగా ఇవ్వడం వల్ల అంతర్గత వాపులు తలెత్తవని మొదట భావించాం. కానీ, అలాంటిదేమీ లేదని అధ్యయనంలో తేలింది’’ అని పరిశోధనకర్త కేథరీన్‌ ఓల్డెన్‌బర్గ్‌ వివరించారు. ప్రపంచ వ్యాప్తంగా వైద్యులు కొవిడ్‌ చికిత్సలో భాగంగా అజిత్రోమైసిన్‌ను వాడాలని సూచిస్తున్న సంగతి తెలిసిందే. 


Tags :

మరిన్ని

జిల్లా వార్తలు
బిజినెస్
మరిన్ని
సినిమా
మరిన్ని
క్రైమ్
మరిన్ని
క్రీడలు
మరిన్ని
పాలిటిక్స్
మరిన్ని
జనరల్
మరిన్ని