Kim: స్లిమ్‌ కిమ్‌.. అనారోగ్యమే కారణం?

తాజా వార్తలు

Updated : 17/06/2021 11:00 IST

Kim: స్లిమ్‌ కిమ్‌.. అనారోగ్యమే కారణం?

సియోల్‌: ఉత్తర కొరియా అధ్యక్షుడు కిమ్‌ జోంగ్‌ ఉన్‌ ఆరోగ్యంపై మళ్లీ ఊహాగానాలు మొదలయ్యాయి. ఆయన బరువు తగ్గినట్లు కనిపించడమే అందుకు కారణం. కిమ్‌ అనారోగ్యంతో బాధపడుతున్నారంటూ గతేడాది కూడా ప్రచారం జరిగింది. కొన్ని నెలలుగా ఆయన బయటి ప్రపంచానికి కనిపించకపోవడంతోనే అలాంటి వార్తలు మొదలయ్యాయి. తాజాగా తమ వర్కర్స్‌ పార్టీ ప్లీనరీ సమావేశంలో పాల్గొన్న కిమ్‌ ఫొటోలను ఉత్తర కొరియా ప్రభుత్వ మీడియా ప్రచురించింది. వాటిలో కిమ్‌ కాస్త సన్నబడినట్లు కనిపిస్తున్నారు. భారీకాయుడైన కిమ్‌ 140 కిలోలు ఉండేవారని, ఇప్పుడు 10-20 కిలోల వరకూ తగ్గారని కొందరు పరిశీలకులు చెబుతున్నారు. ఆయన ముఖం చిన్నగా కనిపిస్తోందని, తను నిత్యం ధరించే ఖరీదైన చేతి గడియారం పట్టీని బిగించి కట్టినట్లు ఫొటోల ద్వారా తెలుస్తోందని వారు చెప్పారు. అయితే సన్నబడినంత మాత్రాన అనారోగ్యంతో ఉన్నట్లు చెప్పలేమని మరికొందరు అభిప్రాయపడుతున్నారు. అధిక బరువుతో ఉండడంతో పాటు ఎక్కువ మోతాదులో ధూమపానం, మద్యపానం చేసే కిమ్‌కు గుండె సంబంధిత సమస్యలు వచ్చే ప్రమాదముందని వైద్యులు హెచ్చరించి ఉంటారని, బరువును తగ్గించుకునే క్రమంలోనే ఆయన సన్నబడి ఉండొచ్చని చెబుతున్నారు. కిమ్‌ నిజంగా అనారోగ్యంతో ఉండి ఉంటే పార్టీ సమావేశానికి వచ్చి ఉండేవారు కాదు అని చెప్పారు. 


Advertisement

Tags :

మరిన్ని

జిల్లా వార్తలు
బిజినెస్
మరిన్ని
సినిమా
మరిన్ని
క్రైమ్
మరిన్ని
క్రీడలు
మరిన్ని
పాలిటిక్స్
మరిన్ని
జనరల్
మరిన్ని