T Cell: వైరస్‌ ‘టి’క్క కుదిర్చే కణాలు!
close

తాజా వార్తలు

Updated : 14/06/2021 07:10 IST

T Cell: వైరస్‌ ‘టి’క్క కుదిర్చే కణాలు!

కరోనా ఎత్తులను చిత్తు చేసేలా ప్రతిదాడి

బర్మింగ్‌హామ్‌: వైరస్‌ సోకడం లేదా టీకా పొందడం వల్ల మన శరీరంలో ఉత్పత్తయ్యే యాంటీబాడీలు చాలా శక్తిమంతంగా ఉంటాయి. అయినా వైరస్‌లు తెలివిగా వీటి కళ్లుగప్పుతుంటాయని శాస్త్రవేత్తలు పేర్కొన్నారు. మన రోగనిరోధక వ్యవస్థలోని టి కణాలు.. ఇలాంటి ఎత్తులను చిత్తు చేస్తాయని తెలిపారు. మానవ కణంలోకి ప్రవేశించిన వైరస్‌.. దాన్ని ఒక కర్మాగారంలా ఉపయోగించుకుంటూ స్వీయ ప్రతులను తయారు చేసుకుంటుంది. ఆ తర్వాత కణాన్ని నాశనం చేసి, కొత్త కణాల్లోకి చేరి.. అక్కడా ఇన్‌ఫెక్షన్‌ కలిగిస్తుంది. ఈ వైరస్‌ను అడ్డుకోవడంలో మన యాంటీబాడీలు ఉపయోగపడతాయి. అవి వైరస్‌కు అతుక్కోవడం ద్వారా మన కణాల్లోకి వాటి ప్రవేశాన్ని నిలువరిస్తాయి. అయితే పొరుగునున్న కణాలకు వ్యాప్తి చెందడం కోసం మొదటి కణం నుంచి వైరస్‌ బయటకు రాకుంటే పరిస్థితి ఏంటి? వాటిపై మన యాంటీబాడీలు సమర్థంగా పనిచేస్తాయా? ఈ అంశంపై శాస్త్రవేత్తలు పరిశోధనలు చేపట్టారు.

సూపర్‌ కణాలు..
అత్యంత ఎక్కువ సంక్రమణ శక్తి కలిగిన కరోనా వైరస్‌.. మానవ కణాలనూ మార్చేస్తుంది. అది రెండు మూడు మానవ కణాలు ఒక్కటిగా కలిసిపోయేలా చేస్తుంది. ఇలా ఏర్పడిన ‘సూపర్‌ కణాలు’ భారీ వైరల్‌ ఫ్యాక్టరీలుగా తయారవుతాయని శాస్త్రవేత్తలు గుర్తించారు. వీటి ద్వారా వైరస్‌ తన సంఖ్యను పెంచుకుంటుందని తేల్చారు. ఈ సూపర్‌ కణాలను ‘సిన్సీషియా’గా పేర్కొంటారు. వీటిలో అనేక కేంద్రకాలు (న్యూక్లియస్‌- కణంలో జన్యుపదార్థం కలిగి ఉండే భాగం), అధికంగా సైటోప్లాజమ్‌ (కేంద్రకం చుట్టూ జిగురులా ఉండే పదార్థం) ఉంటాయి. మరింత సమర్థంగా తన ప్రతులను పెంచుకోవడానికి వైరస్‌కు అవి తోడ్పడతాయి. అలాగే ఈ చర్య ద్వారా.. యాంటీబాడీల బారినపడకుండానే తన వనరులను వైరస్‌ పెంచేసుకుంటుంది. ఈ యాంటీబాడీలు కణాల వెలుపల మాత్రమే సంచరిస్తుంటాయి.

కణం నుంచి కణానికి
దక్షిణాఫ్రికాకు చెందిన అలెక్స్‌ సిగల్‌ నేతృత్వంలోని శాస్త్రవేత్తల బృందం కరోనా వైరస్‌లోని ఆల్ఫా, బీటా వేరియంట్లపై ప్రయోగాలు నిర్వహించింది. ఒక కణం నుంచి బయటకు రాకుండా.. నేరుగా మరో కణంలోకి ఇవి వ్యాప్తి చెందగలవని, తద్వారా యాంటీబాడీలను ఏమార్చగలవని గుర్తించారు. దీన్నిబట్టి.. ఒక కణంపై వైరస్‌ తన పట్టును బిగించి, పక్కనున్న కణాలకూ విస్తరిస్తే దాన్ని నిర్మూలించడం కష్టమని తేల్చారు.
పరిణామక్రమంలో భాగంగా మన రోగనిరోధక వ్యవస్థ కంట్లో పడకుండా దాగి ఉండే కిటుకులను వైరస్‌లు వంటబట్టించుకున్నాయి. వెలుపలికి రాకుండా కణం నుంచి కణానికి నేరుగా వ్యాప్తి చెందే వ్యూహం ఇందులో భాగమే. ఈ విధానంలో కణాలను కలగలపాల్సిన అవసరం ఉండదు. యాంటీబాడీల నుంచి రక్షణ కోసం కణాల మధ్య ఉండే దృఢ బంధాన్ని వైరస్‌ యుక్తిగా ఉపయోగించుకుంటుంది. అయితే కణంలోకి ప్రవేశించకుండా వైరస్‌ను అడ్డుకోవడంలోనే యాంటీబాడీలు సమర్థంగా పనిచేస్తాయి. అప్పటికే ఇన్‌ఫెక్షన్‌ బారినపడ్డ కణాలపై మాత్రం వీటి సమర్థత కాస్త తక్కువగానే ఉంటుంది. దీన్నిబట్టి.. కణం నుంచి కణంలోకి నేరుగా పయనించే వైరస్‌లపై టీకాలు నిష్ప్రయోజనమవుతాయా అన్న ఆందోళన వ్యక్తంకావడం సహజం. అయితే బహుళ పద్ధతుల్లో వైరస్‌లను ఎదుర్కొనే విధానాలను మన రోగనిరోధక వ్యవస్థ అలవర్చుకుందని శాస్త్రవేత్తలు తెలిపారు. టి కణాలూ ఇందులో భాగమే. టీకా పొందినప్పుడు గానీ ఇన్‌ఫెక్షన్‌ సోకినప్పుడు గానీ అవి క్రియాశీలమవుతాయి. ఇన్‌ఫెక్షన్‌ సోకిన కణాలను గుర్తించి, వైరస్‌ను చంపేసేలా తర్ఫీదు పొందుతాయి. అందువల్ల వైరస్‌కున్న ‘కణం నుంచి కణానికి వ్యాప్తి’ సామర్థ్యం దీనిపై ప్రభావం చూపబోదు. టి కణాలు మునుపటి ఇన్‌ఫెక్షన్‌ను గుర్తుపెట్టుకోగలవు. అదే వైరస్‌ మరోసారి దాడి చేస్తే వేగంగా స్పందించగలవు.


Tags :

జిల్లా వార్తలు
బిజినెస్
మరిన్ని
సినిమా
మరిన్ని
క్రైమ్
మరిన్ని
క్రీడలు
మరిన్ని
పాలిటిక్స్
మరిన్ని
జనరల్
మరిన్ని