Indian Navy: రోమియోలు వచ్చేశాయి!

తాజా వార్తలు

Published : 18/07/2021 07:23 IST

Indian Navy: రోమియోలు వచ్చేశాయి!

భారత నౌకాదళంలోకి ఎంహెచ్‌-60ఆర్‌ హెలికాప్టర్లు

దిల్లీ: భారత నౌకాదళ పోరాట సామర్థ్యం మరింత పటిష్ఠమైంది. అమెరికా నుంచి అధునాతన ఎంహెచ్‌-60 రోమియో (ఆర్‌) బహుళ ప్రయోజన హెలికాప్టర్లు మన అమ్ములపొదిలో చేరాయి. అమెరికాలోని శాన్‌డియెగోలో జరిగిన ఒక కార్యక్రమంలో లాంఛనంగా రెండు హెలికాప్టర్లను భారత రాయబారి తరణ్‌జిత్‌ సింగ్‌ సంధుకు అమెరికా నౌకాదళ అధికారులు అందజేశారు.


ప్రపంచంలోనే శక్తిమంతం

‘ఎంహెచ్‌-60ఆర్‌’లు నాలుగోతరం నేవీ హెలికాప్టర్లు. ఈ శ్రేణిలో ఇవి ప్రపంచంలోనే అత్యంత శక్తిమంతమైనవిగా గుర్తింపు పొందాయి. భారత నౌకాదళంలో కాలం చెల్లిన ‘సీ కింగ్‌’ హెలికాప్టర్ల స్థానంలో ఇవి సేవలు అందించనున్నాయి.  
ఆయుధాలు: హెల్‌ఫైర్‌ క్షిపణులు, ఏటీకే మార్క్‌ 50, 46 టోర్పిడోలు, 7.62 ఎంఎం మెషీన్‌ గన్‌.

అడుగడుగునా అధునాతనం: సరికొత్త ఏవియానిక్స్‌, సెన్సర్లు ఈ హెలికాప్టర్‌ సొంతం. పైలట్లు సులువుగా నిర్వహించేలా కాక్‌పిట్‌ను ఆధునిక సాధనాలతో తీర్చిదిద్దారు. ఇందులో కలర్‌ మల్టీ ఫంక్షన్‌ డిస్‌ప్లేలను పెట్టారు. నైట్‌ విజన్‌ గాగుల్స్‌ ద్వారా రాత్రివేళ కూడా ఈ స్క్రీన్‌లను వీక్షించొచ్చు. సూర్యకాంతిలోనూ స్పష్టంగా కనిపించేలా ప్రత్యేకంగా రూపొందించారు. శత్రు క్షిపణి దాడిపై హెచ్చరిక చేసే వ్యవస్థ, మల్టీ మోడ్‌ రాడార్‌, సోనార్‌, ఇన్‌ఫ్రారెడ్‌ జామర్‌ వంటి అనేక సెన్సర్లు ఇందులో ఉన్నాయి. ఎలాంటి వాతావరణంలోనైనా ఈ హెలికాప్టర్‌ పోరాడగలదు. 

జలాంతర్గాములకు చుక్కలే: ఎంహెచ్‌-60హెలికాప్టర్‌..శత్రు జలాంతర్గాములకు చుక్కలు చూపించనుంది. మన నౌకాదళంలోని సముద్రగస్తీ విమానం పి-8ఐ, సీ గార్డియన్‌ డ్రోన్లతో కలిసి ఇది భారత జలాలను శత్రు దుర్భేద్యంగా మార్చనుంది.
శత్రు యుద్ధనౌకలపై పోరు, ప్రత్యేక బలగాల తరలింపు, యుద్ధనౌకల్లోకి సరకుల రవాణా, గాలింపు, సహాయ చర్యలు, పోరాటంలో గాయపడినవారిని తరలించడానికీ ఈ హెలికాప్టర్లు ఉపయోగపడతాయి.  
హిందూ మహాసముద్ర ప్రాంతంలో చైనా జలాంతర్గాముల కదలికల నేపథ్యంలో ఈ హెలికాప్టర్లు మనకు అవసరమయ్యాయి.

* భారత్‌ కొనుగోలు చేస్తున్న హెలికాప్టర్లు: 24

* కాంట్రాక్టు ధర: 260 కోట్ల డాలర్లు

* తయారీదారు: సికోర్‌స్కీ-లాక్‌హీడ్‌ మార్టిన్‌ (అమెరికా)

* ఇంజిన్లు: రెండు (టర్బోషాఫ్ట్‌) 

* గరిష్ఠ వేగం: గంటకు 267 కిలోమీటర్లు

* బరువు: 6,895 కిలోలు

* గరిష్ఠ టేకాఫ్‌ బరువు: 10,659 కిలోలు


Tags :

జిల్లా వార్తలు
బిజినెస్
మరిన్ని
సినిమా
మరిన్ని
క్రైమ్
మరిన్ని
క్రీడలు
మరిన్ని
పాలిటిక్స్
మరిన్ని
జనరల్
మరిన్ని