పాక్‌ తెలివిగా ప్లాన్‌ చేసింది.. కానీ,

తాజా వార్తలు

Updated : 18/02/2021 18:01 IST

పాక్‌ తెలివిగా ప్లాన్‌ చేసింది.. కానీ,

భారత వాయుసేనాధిపతి భదౌరియా

దిల్లీ: యాభై ఏళ్ల క్రితం భారత్‌, పాకిస్థాన్‌ మధ్య జరిగిన యుద్ధంలో లోంగేవాలా ప్రాంతంలో మనల్ని ఓడించేందుకు దాయాది దేశం తెలివిగా ప్లాన్‌ చేసిందని భారత వైమానిక దళ అధిపతి చీఫ్‌ మార్షల్‌ ఆర్‌కేఎస్‌ భదౌరియా వెల్లడించారు. అయితే మన వాయుసేన శక్తిని పాక్‌ అంచనా వేయలేకపోయిందని తెలిపారు. రిటైర్డ్‌ ఎయిర్‌ చీఫ్‌ మార్షల్‌ భరత్‌ కుమార్‌ రచించిన ‘ది ఎపిక్‌ బ్యాటిల్ ఆఫ్‌ లోంగేవాలా’ పుస్తకాన్ని భదౌరియా ఆవిష్కరించారు.

ఈ సందర్భంగా ఆయన మాట్లాడుతూ.. ‘‘లోంగేవాలా యుద్ధం గురించి చాలా చెప్పాలి. యుద్ధం కోసం ఎంచుకున్న ప్రాంతం, మార్గం విషయంలో పాకిస్థాన్‌ సైన్యం అద్భుతమైన ప్లాన్‌ రచించింది. ఆ పథకం ఫలించి ఉంటే పశ్చిమఫ్రంట్‌లో యుద్ధ ఫలితం మారిపోయి ఉండేది. కానీ అక్కడే పాకిస్థాన్‌ ఓ విషయాన్ని మర్చిపోయినట్లు ఉంది. భారత వాయుసేన శక్తిని అంచనా వేయలేకపోయింది. జైసల్మేర్‌లో హంటర్‌ యుద్ధవిమానాలతో ఉన్న సగం స్క్వాడ్రాన్‌ మమ్మల్ని ఏం చేయగలదులే అని అతివిశ్వాసంతో ఉంది. బహుశా వారు చేసిన పొరబాటు అదేనేమో’’ అని భదౌరియా చెప్పుకొచ్చారు.

భారత వాయుసేన శక్తి సామర్థ్యాలేంటో లొంగేవాలా యుద్ధం నిరూపించిందని వాయుసేనాధిపతి అన్నారు. ఇలాంటి గొప్ప ఘటనలు పుస్తక రూపంలో తీసుకొచ్చి భావితరాలకు అందించాల్సిన అవసరం ఎంతైనా ఉందని ఆయన చెప్పారు.

బంగ్లాదేశ్‌ స్వతంత్ర పోరాటంలో భాగంలో భారత్‌, పాకిస్థాన్‌ మధ్య 1971లో యుద్ధం జరిగిన విషయం తెలిసిందే. ఆ యుద్ధంలోనే రాజస్థాన్‌లోని థార్‌ ఎడారిలో ఉన్న లోంగేవాలా పోస్ట్‌పై పాకిస్థాన్‌ బలగాలు దాడి చేశాయి. దాదాపు 2000 నుంచి 3000 మంది పాక్‌ సైనికులు 30 - 40 యుద్ధ ట్యాంకులతో దండెత్తి వచ్చారు. భారత్‌ వైపు కేవలం 120 మంది సైనికులు మాత్రమే ఉన్నారు. అయితే భారత వాయుసేనకు చెందిన 4 హంటర్‌ యుద్ధ విమానాలు భారత సేనకు అండగా రంగంలోకి దిగాయి. దీంతో భారత సైన్యం పైచేయి సాధించి యుద్ధంలో పాక్‌ను మట్టికరిపించింది.


Advertisement

Tags :

మరిన్ని

జిల్లా వార్తలు
బిజినెస్
మరిన్ని
సినిమా
మరిన్ని
క్రైమ్
మరిన్ని
క్రీడలు
మరిన్ని
పాలిటిక్స్
మరిన్ని
జనరల్
మరిన్ని