Adar Poonawalla: బ్రిటన్‌ నిబంధనలు గందరగోళమే..!

తాజా వార్తలు

Published : 02/10/2021 01:41 IST

Adar Poonawalla: బ్రిటన్‌ నిబంధనలు గందరగోళమే..!

సీరం ఇన్‌స్టిట్యూట్‌ చీఫ్‌ అదర్‌ పూనావాలా

పుణె: భారత్‌ తయారు చేస్తోన్న కొవిషీల్డ్‌ (ఆక్స్‌ఫర్డ్‌ ఆస్ట్రాజెనెకా వ్యాక్సిన్‌)ను బ్రిటన్‌ అధికారులు గుర్తించకపోవడం ప్రపంచవ్యాప్తంగా తీవ్ర గందరగోళానికి కారణమవుతున్నాయని సీరం ఇన్‌స్టిట్యూట్‌ ఆఫ్‌ ఇండియా సీఈఓ అదర్‌ పూనావాలా పేర్కొన్నారు. ఈ సందర్భంగా ప్రపంచ ఆరోగ్య సంస్థ ఆమోదించిన వ్యాక్సిన్‌ను ధ్రువీకరించేందుకు ఓ వేదికను రూపొందించుకోవాలని అభిప్రాయపడ్డారు. ఈ ప్రక్రియ సజావుగా కొనసాగేలా అన్ని దేశాలు సహకరించుకోవాలని పిలుపునిచ్చిన ఆయన.. టీకా ధ్రువీకరణకు పరస్పరం అంగీకరించిన ఒప్పందంపై సంతకం చేయాల్సిన అవసరముందని ఓ వార్తా పత్రికకు ఇచ్చిన ఇంటర్వ్యూలో పేర్కొన్నారు.

ఇక వ్యాక్సిన్‌ ఎగుమతిపై స్పందించిన అదర్‌ పూనావాలా.. కొవాక్స్‌ కార్యక్రమం ద్వారా కొవిషీల్డ్‌ వ్యాక్సిన్‌ ఎగుమతిని అక్టోబర్‌ నెలలో తిరిగి ప్రారంభిస్తామని పేర్కొన్నారు. జనవరి నాటికి వ్యాక్సిన్‌ ఎగుమతిని క్రమంగా పెంచుతామని చెప్పారు. దేశంలో కొవిడ్‌ టీకాలకు ఉన్న డిమాండ్‌ దృష్ట్యా గత ఆరు నెలలుగా వీటి ఎగుమతిని నిలిపివేసిన విషయం తెలిసిందే. అయితే, ప్రస్తుతం దేశంలో కొవిషీల్డ్‌ ఉత్పత్తి గణనీయంగా పెరగడంతో మరోసారి వీటిని ఎగుమతి చేసే ప్రయత్నాలు జరుగుతున్నాయి. సీరం ఇన్‌స్టిట్యూట్‌ ప్రతినెలా దాదాపు 20కోట్లపైగా కొవిషీల్డ్‌ డోసులను ఉత్పత్తి చేస్తున్నట్లు సమాచారం.

భారత్‌లో సీరం ఇన్‌స్టిట్యూట్‌ తయారుచేస్తోన్న కొవిషీల్డ్‌ వ్యాక్సిన్‌ తీసుకున్న వారు బ్రిటన్‌ వస్తే.. పదిరోజుల పాటు క్వారంటైన్‌ తప్పనిసరి అంటూ అక్కడి అధికారులు నిబంధనలు విధించారు. మార్గదర్శకాల ప్రకారం కొవిషీల్డ్‌ను ఆమోదించినట్లు చెబుతున్నప్పటికీ.. టీకా ధ్రువీకరణ పత్రంతో తమకు సమస్య ఉందని వెల్లడిస్తున్నారు. దీనిని తీవ్రంగా పరిగణించిన భారత ప్రభుత్వం.. ఇది వివక్షాపూరితమేనని అభిప్రాయపడింది. చివరకు దిగివచ్చిన బ్రిటన్‌ ప్రభుత్వం.. అంతర్జాతీయ పర్యాటక అడ్వైజరీ జాబితాలో కొవిషీల్డ్‌ను చేర్చుతున్నట్లు ప్రకటించింది.


Advertisement

Tags :

మరిన్ని

జిల్లా వార్తలు
బిజినెస్
మరిన్ని
సినిమా
మరిన్ని
క్రైమ్
మరిన్ని
క్రీడలు
మరిన్ని
పాలిటిక్స్
మరిన్ని
జనరల్
మరిన్ని