గల్ఫ్‌ తెలుగు సంఘాల ఆధ్వర్యంలో భారత స్వాతంత్ర్య వేడుకలు
గల్ఫ్‌ తెలుగు సంఘాల ఆధ్వర్యంలో భారత స్వాతంత్ర్య వేడుకలు

కువైట్‌: గల్ఫ్‌లోని తెలుగు సంఘాల సమాఖ్య ఆధ్వర్యంలో భారత 75వ స్వాతంత్ర్య వేడుకలు ఘనంగా నిర్వహించారు. ఆజాదీకా అమృత్‌ మహోత్సవ్‌ పేరుతో ఈ ఏడాది స్వాతంత్ర్య దినోత్సవం జరుపుకోవాలంటూ ప్రధాని మోదీ ఇచ్చిన పిలుపు మేరకు తెలుగు సంఘాల ఐక్యవేదిక-కువైట్‌ ఆధ్వర్యంలో గల్ఫ్‌దేశాల్లోని 8 సంఘాలు వర్చువల్‌గా వేడుకల్లో పాల్గొన్నాయి. ఈ కార్యక్రమానికి ముఖ్యఅతిథిగా కువైట్‌లో భారత రాయబారి సీబీ జార్జి, ప్రత్యేక అతిథిగా శ్రీకాకుళం ఎంపీ కింజరాపు రామ్మోహన్‌నాయుడు,  గౌరవ అతిథిగా తానా అధ్యక్షుడు లావు అంజయ్య చౌదరి హాజరై ప్రపంచ వ్యాప్తంగా ఉన్న భారతీయులకు స్వాతంత్ర్య దినోత్సవ శుభాకాంక్షలు తెలిపారు.

ఈ సందర్భంగా దేశభక్తి నేపథ్యంతో నిర్వహించిన సాంస్కృతిక కార్యక్రమాలు ఆకట్టుకున్నాయి. వ్యాఖ్యాత వెంకప్ప భాగవతులు కార్యక్రమాన్ని వినోదభరితంగా నడిపించారు. అనంతరం తెలుగు సంఘాల ఐక్య వేదిక-కువైట్‌ అధ్యక్షుడు కుదరవల్లి సుధాకరరావు మాట్లాడుతూ గల్ఫ్‌ దేశాల్లోని తెలుగు సంఘాలు ఈ విధంగా స్వాతంత్ర్య వేడుకలు నిర్వహించుకోవడం ఆనందంగా ఉందన్నారు. ఈ కార్యక్రమంలో తెలుగు కళా సమితి- బహ్రెయిన్‌, తెలుగు కళా సమితి- ఒమన్‌, ఆంధ్ర కళా వేదిక- ఖతార్‌, సౌదీ తెలుగు అసోసియేషన్‌- సౌదీ అరేబియా, తెలుగు కళా స్రవంతి- అబుదాబి, తెలుగు తరంగిణి- రస్‌ అల్‌ ఖైమా, ఫుజైరా తెలుగు కుటుంబాలు- ఫుజైరా తదితర సంఘాల అధ్యక్షులు, కార్యవర్గ సభ్యులు పాల్గొన్నారు.


మరిన్ని