Mamata Banerjee: చవితి పండగ రోజునే.. దీదీ నామినేషన్‌

తాజా వార్తలు

Published : 09/09/2021 01:26 IST

Mamata Banerjee: చవితి పండగ రోజునే.. దీదీ నామినేషన్‌

కోల్‌కతా: పశ్చిమబెంగాల్‌లో ఉప ఎన్నికల జోరు మొదలైంది. రాష్ట్ర ముఖ్యమంత్రి మమతా బెనర్జీ బరిలోకి దిగుతున్న భవానీపూర్‌ నియోజకవర్గం ఈ ఎన్నికల్లో ప్రతిష్ఠాత్మకంగా మారింది. దీదీకి పోటీగా బలమైన అభ్యర్థిని రంగంలోకి దింపేందుకు భాజపా వ్యూహాలు రచిస్తోంది. మరోవైపు తృణమూల్‌ పార్టీ కూడా ప్రచారం కూడా మొదలుపెట్టింది. వచ్చే శుక్రవారం వినాయకచవితి పండగ రోజున ఉప ఎన్నికకు నామినేషన్‌ వేయనున్నట్లు దీదీ నేడు ప్రకటించారు. 

భవానీపూర్ నియోజకవర్గ పరిధిలోని చెత్లాలో బుధవారం మమతా బెనర్జీ అధ్యక్షతన టీఎంసీ కార్యకర్తల సదస్సు జరిగింది. ఈ సందర్భంగా ఆమె మాట్లాడుతూ భాజపాపై మరోసారి విమర్శల వర్షం కురిపించారు. భాజపా కుట్ర వల్ల ఉప ఎన్నికలకు వెళ్లాల్సి వచ్చిందని అన్నారు. ‘‘రాష్ట్రంలో అసెంబ్లీ ఎన్నికలు ఎలా జరిగాయో కేవలం ఆ దేవుడికే తెలుసు. కేంద్రం ఎన్నో అబద్ధాలు చెప్పింది. అయినా మనల్ని ఓడించలేకపోయింది. నందిగ్రామ్‌లో నాపై కుట్ర జరిగింది. బెంగాల్‌ ప్రజలను తప్పుదారి పట్టించేందుకు 1000 మంది గూండాలను బయటి నుంచి దించారు. వారు రాజకీయంగా పోరాడలేరు. అందుకే దర్యాప్తు సంస్థలను ప్రయోగిస్తారు. నా విషయంలోనూ అదే జరిగింది’’ అని దుయ్యబట్టారు. 

బెంగాల్‌లోని భవానీపూర్‌తో పాటు షంషేర్‌గంజ్‌, జాంగిపూర్‌ నియోజకవర్గాలకు ఈ నెల 30న పోలింగ్‌ జరగనుంది. అక్టోబరు 3న ఫలితాలు ప్రకటించనున్నారు. ఈ ఏడాది ఆరంభంలో జరిగిన రాష్ట్ర అసెంబ్లీ ఎన్నికల్లో భవానీపూర్‌ నుంచి తృణమూల్ నేత సోభాందేవ్‌ ఛటోపాధ్యాయ పోటీ చేసి విజయం సాధించారు. అయితే నందిగ్రామ్‌లో మమత ఓడిపోయిన నేపథ్యంలో సోభాందేవ్‌ తన శాసనసభ సభ్యత్వానికి రాజీనామా చేశారు. దీంతో ఉప ఎన్నిక అనివార్యమైంది. ఇక  భవానీపూర్‌ నుంచి దీదీ గతంలో రెండు సార్లు విజయఢంకా మోగించారు.


Advertisement

Tags :

మరిన్ని

జిల్లా వార్తలు
బిజినెస్
మరిన్ని
సినిమా
మరిన్ని
క్రైమ్
మరిన్ని
క్రీడలు
మరిన్ని
జనరల్
మరిన్ని
జాతీయ- అంతర్జాతీయ
మరిన్ని