IPL 2021: సోషల్‌ మీడియాలో చెత్తవాగుడు వాగకండి: మాక్స్‌వెల్ సీరియస్‌

తాజా వార్తలు

Updated : 12/10/2021 12:40 IST

IPL 2021: సోషల్‌ మీడియాలో చెత్తవాగుడు వాగకండి: మాక్స్‌వెల్ సీరియస్‌

ఇంటర్నెట్‌డెస్క్‌: ఐపీఎల్‌లో రాయల్‌ ఛాలెంజర్స్‌ బెంగళూరు మరోసారి విఫలమవ్వడంపై సామాజిక మాధ్యమాల్లో వస్తోన్న ట్రోలింగ్‌ను చూసి ఆ జట్టు ఆల్‌రౌండర్‌ గ్లెన్‌ మాక్స్‌వెల్‌ తీవ్ర అసహనం వ్యక్తం చేశాడు. నెటిజెన్లు ఇష్టమొచ్చినట్లు మాట్లాడటంపై ఆగ్రహం వ్యక్తం చేశాడు. మర్యాదగా ప్రవర్తించాలని సూచించాడు. సోమవారం రాత్రి జరిగిన ఎలిమినేటర్‌ మ్యాచ్‌లో బెంగళూరు .. కోల్‌కతా చేతిలో 4 వికెట్ల తేడాతో ఓటమిపాలైన సంగతి తెలిసిందే. ఈ నేపథ్యంలోనే కోహ్లీసేనను ఉద్దేశిస్తూ పలువురు నెటిజెన్లు సోషల్‌ మీడియాలో కామెంట్లు చేస్తున్నారు. దీంతో మాక్సీ ట్విటర్‌ వేదికగా స్పందిస్తూ ఒక పోస్టు పెట్టాడు.

‘ఈ సీజన్‌లో మేం బాగా ఆడినా దురదృష్టంకొద్దీ కీలక మ్యాచ్‌లో ఓడిపోయాం. అనుకున్నదానికి చేరువగా వచ్చి త్రుటిలో అవకాశాన్ని కోల్పోయాం. ఇదో గొప్ప సీజన్‌. అయితే, సామాజిక మాధ్యమాల్లో చెత్తవాగుడు తీవ్రంగా కలచివేసింది. మేం కూడా మనుషులమే. ప్రతి మ్యాచ్‌లో అత్యుత్తమ ప్రదర్శన చేయడానికే ప్రయత్నిస్తాం. అభ్యంతరకర వ్యాఖ్యలు చేస్తున్నారు. మర్యాదగా ప్రవర్తించండి. అలాగే మాకు అండగా నిలిచి ఎల్లవేళలా ప్రేమాభిమానాలు కురిపించిన నిజమైన ఆర్సీబీ అభిమానులకు ధన్యవాదాలు. కానీ, కొంత మంది సామాజిక మాధ్యమాలను అసహ్యంగా మారుస్తున్నారు. ఇది ఏ మాత్రం ఆమోదయోగ్యం కాదు. మీరూ వాళ్లలా ఉండకండి’ అని మాక్స్‌వెల్‌ వాపోయాడు.

గతేడాది పంజాబ్‌ తరఫున ఆడిన మాక్స్‌వెల్‌ 13 మ్యాచ్‌ల్లో కేవలం 108 పరుగులే చేసి పూర్తిగా విఫలమయ్యాడు. దీంతో అతడిపై తీవ్ర విమర్శలు వచ్చాయి. అయినా, రాయల్‌ ఛాలెంజర్స్‌ బెంగళూరు ఈసారి వేలంలో భారీ ధర వెచ్చించి మరీ కొనుగోలు చేసింది. ఆ జట్టు నమ్మకాన్ని నిలబెడుతూ మాక్స్‌వెల్‌ ఈ సీజన్‌లో రెచ్చిపోయాడు. ఆడిన 15 మ్యాచ్‌ల్లో ఆరు అర్ధశతకాలతో 513 పరుగులు సాధించి ఆర్సీబీ తరఫున అత్యధిక వ్యక్తిగత స్కోర్‌ నమోదు చేశాడు. అలాగే టాప్‌ బ్యాట్స్‌మెన్‌లో ఐదో స్థానంలో నిలిచాడు. అంత బాగా ఆడిన ఈ ఆస్ట్రేలియా ఆల్‌రౌండర్‌ కోల్‌కతాతో జరిగిన కీలకపోరులో విఫలమయ్యాడు. 15 పరుగులే చేసి నిరాశపర్చాడు. మరోవైపు ఇతర బ్యాట్స్‌మెన్‌ కూడా పరుగులు చేయలేకపోవడంతో ఆర్సీబీ 138/7 తక్కువ స్కోరే సాధించింది. అనంతరం కోల్‌కతా ఆ లక్ష్యాన్ని ఛేదించింది. ఈ నేపథ్యంలోనే సామాజిక మాధ్యమాల్లో ఆర్సీబీపై, మాక్స్‌వెల్‌పై విమర్శలు వచ్చాయి.



Advertisement

Tags :

మరిన్ని

జిల్లా వార్తలు
బిజినెస్
మరిన్ని
సినిమా
మరిన్ని
క్రైమ్
మరిన్ని
పాలిటిక్స్
మరిన్ని
జనరల్
మరిన్ని
జాతీయ- అంతర్జాతీయ
మరిన్ని