నిన్ను నీవు.. గెలవాలి

సక్సెస్‌ మంత్ర

ఇతరుల విజయాలు మనలో స్ఫూర్తి రగిలిస్తాయి. మనల్నీ ఊరిస్తాయి. కానీ ఆ ఛాయాఛత్రం కిందే ఉంటే మనం ముందుకెళ్లలేం. అందుకిలా ఆచరణ మొదలవ్వాలి.
వెన్నాడే నీడ: కష్టపడితే ఆలస్యంగా అయినా విజయం దక్కడం ఖాయం. ఈ క్రమంలో నిన్ను నీవు కోల్పోవద్దు. మన జీవితాంతం తోడుండేది మన నీడ ఒక్కటే. దీన్నే ఆత్మ, హృదయం, మనస్సాక్షి.. ఏదైనా అనుకోవచ్చు. ఆత్మసాక్షికి నచ్చనిది ఏదీ చేయొద్దు.
నిన్ను నీవు పరీక్షించుకో: ఇతరుల అడుగుజాడల్లో వెళ్లిన ప్రతి ఒక్కరికీ విజయం సొంతం అవుతుందని చెప్పలేం. ఒకరికి వర్కవుట్‌ అయింది మరొకరికి కాకపోవచ్చు. విజేతల నుంచి స్ఫూర్తిని మాత్రమే తీసుకోవాలి. సొంత దారి ఎంచుకోవాలి.  
సరైన ఎంపిక: మనమేంటో, మన ప్రతిభ ఏంటో మనకే తెలుస్తుంది. మనకు ఏది నప్పుతుందో మనమే తేల్చుకోగలుగుతాం. ఉదాహరణకు మన అన్నయ్య లేదా బాబాయ్‌ ఏదో ఒక వృత్తి, రంగం ఎంచుకుంటాడు. విజయం సాధిస్తాడు. మనమూ మన ప్రతిభకు నప్పే, సరిపోయే రంగమే ఎంచుకోవాలి.
ఆత్మవిశ్వాసంతో: మనం ఎక్కడికెళ్లినా మన నీడ వెంటాడుతూనే ఉంటుంది. మన విజయాలు, అపజయాలు ఎత్తుపల్లాలు, కష్టసుఖాలు.. మంచీచెడూ ప్రతీదీ మన సొంతమే. కష్టాల నుంచే రాటుదేలుతాం. సవాళ్లను ఎలా ఎదుర్కోవాలో పట్టు సాధిస్తాం. కొత్త ఆలోచలొస్తాయి. మనకు మనమే స్ఫూర్తిదాతలుగా మారతాం.