AP New Districts: రాయలసీమకు సముద్రతీరం!

రాష్ట్రంలో  మారనున్న వివిధ జిల్లాల లెక్కలు
12 తీరంలో, 2 ఏజెన్సీలో, 12 మైదాన ప్రాంతంలో...

ఈనాడు, అమరావతి: కొత్త జిల్లాల ఏర్పాటుతో కోస్తా, సీమ జిల్లాల లెక్కలూ మారనున్నాయి. రాష్ట్రంలోని 13 జిల్లాల్లో ఇప్పటివరకు శ్రీకాకుళం నుంచి నెల్లూరు వరకు 9 జిల్లాలను కోస్తా ప్రాంతంగా... కడప, కర్నూలు, చిత్తూరు, అనంతపురంలను రాయలసీమగా పరిగణిస్తున్నారు. 26 జిల్లాల పునర్విభజనతో కోస్తా జిల్లాల సంఖ్య 12 కానుంది. అలాగే ఏజెన్సీ ప్రాంతంలో రెండు, మైదాన ప్రాంతంలో 12 జిల్లాలు రానున్నాయి. సూళ్లూరుపేట నియోజకవర్గాన్ని తిరుపతి కేంద్రంగా ఏర్పడే శ్రీబాలాజీ జిల్లాతో కలపడంతో రాయలసీమకు తీరప్రాంతం వచ్చినట్లయింది. ఇప్పటివరకు ప్రత్యేకంగా ఏజెన్సీ జిల్లాలనేవి లేవు. ఉత్తరాంధ్రతో పాటు తూర్పుగోదావరి జిల్లాలో కొంత భాగాన్ని ఏజెన్సీ ప్రాంతాలుగానే పిలిచేవారు. ఇప్పుడు పాడేరు, పార్వతీపురం కేంద్రాలుగా రెండు కొత్త జిల్లాలు ఏర్పాటవుతున్నాయి. రాయలసీమలో జిల్లాల సంఖ్య ఎనిమిదికి పెరిగింది. కొత్తగా నంద్యాల, శ్రీసత్యసాయి, శ్రీబాలాజీ, అన్నమయ్య జిల్లాలు ఏర్పాటవుతున్నాయి.

కోస్తా: శ్రీకాకుళం, విజయనగరం, విశాఖపట్నం, అనకాపల్లి, కాకినాడ, కోనసీమ (అమలాపురం), పశ్చిమగోదావరి (భీమవరం), కృష్ణా, బాపట్ల, ప్రకాశం, నెల్లూరు, శ్రీబాలాజీ (తిరుపతి).

ఏజెన్సీ: మన్యం (పార్వతీపురం), అల్లూరి సీతారామరాజు (పాడేరు).

మైదాన ప్రాంత జిల్లాలు: తూర్పుగోదావరి (రాజమహేంద్రవరం), ఏలూరు, ఎన్టీఆర్‌ (విజయవాడ), గుంటూరు, పల్నాడు (నరసరావుపేట), నంద్యాల, కర్నూలు, అనంతపురం, శ్రీసత్యసాయి (పుట్టపర్తి), వైఎస్సార్‌ కడప, అన్నమయ్య (రాయచోటి), చిత్తూరు.