వేధింపులు తాళలేక కారులో నుంచి దూకేసి..

అమృత్‌సర్‌: ఓ క్యాబ్‌ డ్రైవర్‌ వేధింపులు భరించలేక ఇద్దరు మహిళలు ప్రయాణిస్తున్న కారులోంచి బయట దూకేశారు. ఇది గమనించిన స్థానికులు కారును వెంబడించి అందులో ఉన్న మరో మహిళను రక్షించారు. ఈ ఘటన పంజాబ్‌లోని అమృత్‌సర్‌లో చోటుచేసుకుంది. రంజిత్‌ ఎవెన్యూ ప్రాంతంలోని ఓ రెస్టారెంట్‌కు వెళ్లేందుకు ముగ్గురు మహిళలు ఓ క్యాబ్‌ను‌ మాట్లాడుకున్నారు. అయితే, దారిమధ్యలో క్యాబ్‌ డ్రైవర్‌ ఓ మహిళపై లైంగిక వేధింపులకు పాల్పడ్డాడు. ఆమె ప్రతిఘటించడంతో క్యాబ్‌ వేగాన్ని పెంచి తన దుశ్చర్యను కొనసాగించాడు. అతడి నుంచి ఎలాగైనా తప్పించుకోవాలనే ఉద్దేశంతో ఇద్దరు మహిళలు నడుస్తున్న కారులో నుంచి బయటకు దూకేశారు. దీంతో వారికి గాయాలయ్యాయి. వారు బయటకు దూకడాన్ని గమనించిన స్థానికులు కారును వెంబడించి అందులో ఉన్న మరో మహిళను కాపాడారు. డ్రైవర్‌ను పోలీసులు అదుపులోకి తీసుకున్నారు. కేసు నమోదు చేసి దర్యాప్తు చేస్తున్నట్లు అధికారులు తెలిపారు.