నన్ను కాల్చొద్దు..  నేరస్థుడి వింత లొంగుబాటు

సంభాల్‌: నేర చరిత్రతో పోలీసు రికార్డులకెక్కిన ఓ వ్యక్తి పోలీసులకు లొంగిపోవాలనుకున్నాడు. అయితే తాను కనిపించిన వెంటనే పోలీసులు కాల్చి చంపుతారనే అనుమానం అతడిని వేధించింది. అందుకోసం ఓ ఉపాయాన్ని ఆలోచించాడు. ‘‘నన్ను కాల్చవద్దు..’’ అని రాసి ఉన్న ఓ అట్టముక్కను మెడలో ధరించి మరీ.. పోలీసుల ముందుకు వెళ్లాడు.

నయీమ్‌ అనే ఈ వ్యక్తి ఉత్తర్‌ ప్రదేశ్‌లోని సంభాల్‌ ప్రాంతంలోని నక్షాసా పోలీస్‌ స్టేషన్‌ పరిధిలో ఆదివారం సాయంత్రం లొంగిపోయాడు. ‘‘నాకు సంభాల్‌ పోలీసులంటే భయం. నేను నా తప్పులను ఒప్పుకుంటున్నాను. నేను లొంగిపోతున్నాను. దయచేసి నన్ను కాల్చకండి’’ అని రాసి ఉన్న అట్ట ముక్కను ధరించి పోలీస్‌ స్టేషన్‌లోకి అడుగుపెట్టాడు. నయీమ్‌ వివిధ నేరాల్లో నిందితుడని.. అతడిని పట్టిస్తే రూ.15,000 బహుమతి కూడా ప్రకటించినట్లు పోలీసులు తెలిపారు.