హాథ్రస్‌ బాధితురాలంటూ ఆమె చిత్రాలు

దిల్లీ హైకోర్టులో వ్యక్తి ఫిర్యాదు

దిల్లీ: తన భార్య చిత్రాలను హాథ్రస్‌ బాధితురాలంటూ వివిధ సామాజిక మాధ్యమాల్లో తప్పుగా ప్రచారం చేస్తున్నారంటూ ఓ వ్యక్తి న్యాయస్థానాన్ని ఆశ్రయించారు. మరణించిన తన భార్య చిత్రాన్ని.. హాథ్రస్‌ సామూహిక హత్యాచార ఘటనలో ప్రాణాలు కోల్పోయిన బాధితురాలిగా ప్రచారం చేస్తున్నారని అజయ్‌ కుమార్‌ అనే వ్యక్తి దిల్లీ హైకోర్టులో పిటిషన్‌ దాఖలు చేశారు.

ఈ కేసును జస్టిస్‌ నవీన్‌ చావ్లా ఏక సభ్య ధర్మాసనం విచారణకు స్వీకరించింది. ఈ ఫిర్యాదుపై స్పందించాల్సిందిగా ఎలక్ట్రానిక్స్, ఇన్ఫర్మేషన్ టెక్నాలజీ మంత్రిత్వ శాఖకు ఆదేశాలు జారీచేసింది. ఆ వ్యక్తి ఆరోపణలు నిజమైతే మూడురోజుల్లోగా ఫేస్‌బుక్‌, ట్విటర్‌, గూగుల్‌లకు అవసరమైన సూచనలు చేయాల్సిందిగా ధర్మాసనం ఆదేశించింది. ఆ చిత్రం ఎవరిది అనే విషయాన్ని అలా ఉంచితే.. అత్యాచార బాధితురాలి వివరాలను బహిర్గతం చేయటం చట్ట ప్రకారం నేరమని కోర్టు వెల్లడించింది. కాగా, ఈ కేసు తదుపరి విచారణను నవంబరు 9కి వాయిదా వేసింది.