చోరీ కోసం వచ్చి..ఊపిరాడక మృతి!

అగ్గిపుల్ల వెలిగించడంతో శానిటైజర్‌, పెట్రోలుకు మంటలు

టేక్మాల్‌: చోరీకోసం దుకాణం లోనికి చొరబడ్డ వ్యక్తి ఊపిరాడక అక్కడే మరణించిన ఉదంతమిది. షట్టర్‌ మూసేసి వెలుతురు కోసం అగ్గిపుల్ల వెలిగించడంతో అక్కడ ఉన్న శానిటైజర్‌, పెట్రోలుకు అంటుకుని మంటలు వ్యాపించాయి. దానికి తోడు గది నిండా పొగ నిండిపోవడంతో ఊపిరాడక శేఖర్‌(35) అనే ఆ దొంగ కన్ను మూశాడు. మెదక్‌ జిల్లా టేక్మాల్‌ మండలం పల్వంచ గ్రామంలో శుక్రవారం అర్ధరాత్రి ఈ సంఘటన చోటుచేసుకుంది. శనివారం ఉదయం దుకాణ యజమాని స్వామి షట్టరు తీసి చూసే సరికి శేఖర్‌ విగతజీవిగా కనిపించాడు. ప్రమాదంపై కేసు నమోదు చేసి దర్యాప్తు చేపట్టామని ఎస్‌ఐ లింబాద్రి తెలిపారు.