Gujarat: ఫోన్లో మాట్లాడుతున్నారని...ఇద్దరు బాలికలపై గ్రామస్థుల దాడి

గుజరాత్‌లోని దహోడ్‌లో ఘటన

దహోడ్‌: ఇద్దరు బాలికలు తమ తమ ఫోన్లలో మాట్లాడుతుండగా ఆగ్రహించిన గ్రామస్థులు దాడి చేసి కొట్టిన ఘటన గుజరాత్‌లో చోటుచేసుకుంది. దీనికి సంబంధించిన వీడియో సామాజిక మాధ్యమాల్లో వైరల్‌ అవుతూ నెల రోజుల తర్వాత పోలీసుల దృష్టికి వెళ్లడంతో వారు నిందితులపై కేసు నమోదు చేశారు. దహోడా జిల్లా భువేరా గ్రామంలో 13, 16 ఏళ్ల వయస్సు గల ఇద్దరు బాలికలు జూన్‌ 25న ఫోన్లలో సంభాషిస్తుండగా 15 మంది పురుషులు తీవ్ర అభ్యంతరం చెబుతూ వారిని చుట్టుముట్టి పరుషమైన పదాలతో దూషించారు. భౌతిక దాడికీ పాల్పడ్డారు. ఈ ఘటనపై ఎవరూ పోలీసులకు ఫిర్యాదు చేయలేదు. దాడి సమయంలో బాలికలు తీవ్ర భయంతో వణికిపోతున్న దృశ్యాన్ని ఎవరో వీడియోలో చిత్రీకరించి సామాజిక మాధ్యమంలో పోస్ట్‌ చేయడంతో వైరల్‌ అయ్యింది. చివరకు పోలీసులు స్పందించి బాలల సంరక్షణ చట్టం కింద నిందితులపై కేసు పెట్టారు.