Suicide: ఐదుగురు కుమార్తెలతో బావిలోకి దూకిన తల్లి

రాజస్థాన్‌లోని కోటాలో హృదయ విదారక ఘటన

ఈనాడు, జైపుర్‌: భర్త వేధింపులు భరించలేక.. ఓ భార్య తన ఐదుగురు మైనర్‌ కుమార్తెలతో బావిలోకి దూకిన ఘటన రాజస్థాన్‌లోని కోటా జిల్లాలో సంచలనం సృష్టించింది. ఈ ఘటనలో ఆమె సహా ఐదుగురు చిన్నారులూ మృతి చెందారు. పోలీసుల కథనం ప్రకారం.. కాలియా ఖేడీ గ్రామంలో నివసిస్తున్న శివ్‌లాల్‌ బంజారా, అతని భార్య బాదం దేవి(40) తరచూ గొడవలు పడేవారు. శనివారం రాత్రి భర్త సమీప బంధువుల ఇంటికి వెళ్లారు. ఆ సమయంలో తన ఐదుగురు కుమార్తెలతో బాదందేవి బయటకు వెళ్లారు. ఆదివారం ఉదయం గ్రామానికి సమీపంలోని బావిలో వారంతా శవాలుగా తేలారు. బాదంతో పాటు సావిత్రి(14), అంకలి(8), కాజల్‌(6), గుంజన్‌(4), అర్చన(1) మృతి చెందారు. శివ్‌లాల్‌ దంపతులకు మరో ఇద్దరు కుమార్తెలు గాయత్రి (15), పూనమ్‌ (7) కూడా ఉన్నారు. బాదం బయటికి వెళ్లే సమయంలో వారు గాఢనిద్రలో ఉండటంతో ప్రాణాపాయం తప్పించుకోగలిగారు.