అనిశా వలకు చిక్కిన అవినీతి తిమింగలం‌

₹1.10 కోట్లు లంచం తీసుకుంటూ పట్టుబడిన కీసర తహసీల్దార్‌

(ప్రతీకాత్మక చిత్రం)

మేడ్చల్‌: అవినీతి నిరోధక శాఖ అధికారుల వలకు మరో తిమింగలం చిక్కింది. భూవ్యవహారంలో భారీ మొత్తంలో లంచం తీసుకుంటూ మేడ్చల్‌ జిల్లా  కీసర మండల తహసీల్దార్‌ నాగరాజు అనిశా అధికారులకు పట్టుబడిన ఘటన శుక్రవారం రాత్రి చోటుచేసుకుంది. అధికారులు తెలిపిన వివరాల ప్రకారం..తహసీల్దార్‌ నాగరాజు మండలంలోని రాంపల్లిలో ఉన్న 28 ఎకరాల భూవ్యవహారమై గత కొంత కాలంగా డబ్బు డిమాండ్‌ చేస్తున్నారు. ఈ నేపథ్యంలో బాధితుడు శుక్రవారం ఏఎస్‌రావు నగర్‌లోని అతని ఇంట్లో రూ.కోటి 10 లక్షలు తహసీల్దార్‌ తీసుకుంటుండగా.. ఏసీబీ అధికారులు వలపన్ని పట్టుకున్నారు. అతనితో పాటు భూవ్యవహారంలో పాల్గొన్న అంజిరెడ్డి,  స్థిరాస్తి వ్యాపారి‌ శ్రీనాథ్‌లను అదుపులోకి తీసుకుని విచారణ చేపట్టామని అధికారులు తెలిపారు. గతంలో ఇదే తహసీల్దార్‌పై ఆదాయానికి మించి ఆస్తులు కలిగి ఉన్నాడని కేసులు నమోదై ఉన్నాయి.