కడప జిల్లాలో శానిటైజర్‌ తాగి ముగ్గురి మృతి

పెండ్లిమర్రి : ప్రకాశం జిల్లాలోనే కాదు.. కడప జిల్లాలోనూ మత్తు కోసం మందుబాబులు శానిటైజర్‌ తాగి ప్రాణాల మీదకు తెచ్చుకుంటున్నారు.  కడప జిల్లా పెండ్లిమర్రిలో శానిటైజర్‌ తాగి ముగ్గురు మృతి చెందారు. నిన్న శానిటైజర్‌ తాగిన ఇద్దరు వ్యక్తుల్లో ఒకరు అక్కడికక్కడే మృతి చెందగా.. మరొకరు రిమ్స్‌ ఆస్పత్రిలో చికిత్స పొందుతూ ప్రాణాలు కోల్పోయారు. ఈ రోజు ఉదయం ఇంటి వద్ద మరొకరు చనిపోయారు.

ఈ ప్రాంతంలో వారం రోజుల నుంచి ఆరుగురు శానిటైజర్‌ తాగుతున్నట్లు స్థానికులు గుర్తించి అధికారులకు సమాచారమందించారు. మద్యం ధరలు భరించలేక మందుబాబులు ఇలా శానిటైజర్‌ తాగుతున్నారని బాధిత కుటుంబసభ్యులు చెబుతున్నారు. ఈ ఘటనపై పోలీసులు కేసు నమోదు చేసి దర్యాప్తు చేపట్టారు.

ప్రకాశం జిల్లాలో శానిటైజర్‌ తాగి ప్రాణాలు కోల్పోయిన వారి సంఖ్య 16కి చేరిన విషయం తెలిసిందే.