Chit Funds Fraud: చీటీల పేరుతో ₹45 కోట్లకు టోకరా

హిందూపురం: చీటీల పేరుతో ఓ మహిళ తమను మోసం చేసిందంటూ అనంతపురం జిల్లా హిందూపురం రెండో పట్టణ పోలీసుస్టేషన్ ఎదుట బాధితులు ఆందోళన చేపట్టారు. హిందూపురం సత్యనారాయణపేటకు చెందిన విజయలక్ష్మి 20 ఏళ్లుగా ‘వైవీఏ గ్రూప్ ఫండ్స్’ పేరుతో చీటీ వ్యాపారం నిర్వహిస్తోంది. వారం రోజుల నుంచి ఆమె కనిపించకపోవడంతో అనుమానం వచ్చి కొందరు బాధితులు పోలీసులను ఆశ్రయించారు. ప్రజల నుంచి సుమారు రూ.45 కోట్లను వసూలు చేసి ఆ నగదుతో పరారైనట్లు బాధితులు ఫిర్యాదు చేశారు. నిందితురాలిని పట్టుకొని నగదు ఇప్పించాలని కోరుతున్నారు. బాధితుల ఫిర్యాదు మేరకు కేసు నమోదు చేసుకొని దర్యాప్తు చేపట్టినట్లు పోలీసులు వెల్లడించారు.