సీసీటీవీ ఫుటేజ్‌: మాటల్లో పెట్టు.. చీరలు మూటకట్టు

హైదరాబాద్‌: నలుగురైదుగురు కలిసి దుకాణానికి ఒకేసారి వస్తారు. నిజంగా దుస్తులు కొనేందుకు వచ్చినట్లు హంగూ ఆర్భాటం చూపిస్తారు. ఒకరిద్దరు సేల్స్‌మెన్‌ను మాటల్లో పెట్టి చీరలు బేరమాడుతుంటారు. మరోవైపు మిగిలిన వాళ్లు దొరికినకాడికి చీరలను చాకచక్యంగా దుకాణం దాటించేస్తారు. ఇది ఏ సినిమాలోనో జరిగిన దొంగతనం కాదండీ. కామారెడ్డి జిల్లా భిక్కనూరు మండల కేంద్రంలోని శ్రీ రాజరాజేశ్వర శారీ సెంటర్‌లో పట్టపగలే ఈ చోరీ జరిగింది.

దుకాణంలో కౌంటరుపై ఉన్న బాలికను నలుగురు మహిళలు మాటల్లో పెట్టి దొంగతనానికి పాల్పడ్డారు. రూ.20 వేల విలువ చేసే చీరలను గుర్తుతెలియని నలుగురు మహిళలు ఎత్తుకెళ్లారు. ఆ నలుగురు మహిళలు చీరలను ఎత్తుకెళ్లే దృశ్యాలు సీసీ టీవీ కెమెరాలో రికార్డ్‌ అయ్యాయి. దుకాణ యజమాని పోలీస్‌స్టేషన్‌లో ఫిర్యాదు చేశాడు. ఈ మేరకు భిక్కనూరు పోలీస్‌లు కేసు నమోదు చేసుకొని సీసీ టీవీ ఫుటేజ్ ఆధారంగా దర్యాప్తు చేపట్టారు. నిందితులను పట్టుకునే పనిలో పడ్డారు. ఆ నలుగురు మహిళలు ఎంత చాకచక్యంగా చీరలను దొంగిలించారో మీరూ చూడండి.