తప్పులను ఒప్పుకొని ఈటల ముక్కు నేలకు రాయాలి: బాల్క సుమన్‌

హైదరాబాద్‌: పేదలు, ప్రభుత్వ భూములు కబ్జా చేసినట్లు తేలినందున మాజీ మంత్రి, భాజపా ఎమ్మెల్యే ఈటల రాజేందర్‌ రాష్ట్ర ప్రజలకు క్షమాపణలు చెప్పాలని తెరాస ఎమ్మెల్యే బాల్క సుమన్‌ డిమాండ్‌ చేశారు. జమునా హేచరీస్‌ 70 ఎకరాలు కబ్జా చేసినట్లు మెదక్‌ జిల్లా కలెక్టర్‌ నివేదిక ఇచ్చారన్నారు. తెలంగాణ భవన్‌లో నిర్వహించిన మీడియా సమావేశంలో ఆయన మాట్లాడారు. మెదక్‌ కలెక్టర్‌పై ఈటల కుటుంబీకులు చేసిన ఆరోపణలు సరికాదని.. ప్రభుత్వ, పేదల భూములు తిరిగి అప్పగించాలని డిమాండ్‌ చేశారు. ఇప్పటికైనా ఈటల రాజేందర్‌ చేసిన తప్పులను ఒప్పుకొని ముక్కు నేలకు రాయాలన్నారు. ఈ విషయంలో రాబోయే రోజుల్లో చట్టపరంగా ఏమేం జరగాలో అవన్నీ అవుతాయని సుమన్‌ అన్నారు.