మరణించి ఎనిమిది మందికి ఊపిరిపోసింది

చిట్యాల గ్రామీణం, న్యూస్‌టుడే: ఓ మహిళ మరణించి ఎనిమిది మందికి అవయవ దానం చేసిన ఘటన చిట్యాల మండలంలోని వెలిమినేడులో ఆదివారం చోటు చేసుకుంది... ఆ గ్రామానికి చెందిన అశ్విని(25), రెండు ఏళ్ల క్రితం శ్రీనుతో వివాహం చేశారు. ఈ క్రమంలో మూడు రోజుల క్రితం వలిగొండ మండలంలోని వేములకొండకు పాపకు తలనీలాలు తీసేందుకు భర్తతో కలిసి ద్విచక్ర వాహనంపై వెళ్లింది. ఆ వాహనం ప్రమాదవశాత్తు కింద పడింది. ఆమె తలకు తీవ్ర గాయాలవడంతో మెరుగైన చికిత్స నిమిత్తం హైదరాబాద్‌లోని ఓ ఆసుపత్రికి తరలించారు. అక్కడే చికిత్స పొందుతూ బ్రెయిన్‌ డెడ్‌ కావడంతో మృతి చెందినట్లు వైద్యులు ధృవీకరించారు. కుటుంబ సభ్యుల అంగీకారం మేరకు ఆమె అవయవాలను వైద్యులు సేకరించి ఎనిమిది మందికి అమర్చారు. మృతురాలు అంత్యక్రియలను వెలిమినేడులో నిర్వహించారు.