డిసెంబర్‌లో మరోసారి లాక్‌డౌన్‌.. నిజమెంత?

దిల్లీ: దేశంలో కరోనా వైరస్‌ వ్యాప్తితో సమానంగా దానికి సంబంధించిన అసత్య ప్రచారాలు కూడా అంతే వేగంగా వ్యాపిస్తున్నాయి. సామాజిక మాధ్యమాల్లో హల్‌చల్‌ చేస్తున్నాయి. దీంతో ఏది నిజం, ఏది అబద్దం తెలుసుకోలేక ప్రజలు అయోమయానికి గురౌతున్నారు. తాము అధికారికంగా ధ్రువీకరించే వరకు ఏ విధమైన సమాచారాన్నీ విశ్వసించొద్దంటూ ప్రభుత్వం పదేపదే విజ్ఞప్తి చేయటం పరిపాటిగా మారింది. ఈ క్రమంలో కరోనా కట్టడికి దేశంలో డిసెంబర్‌ 1 నుంచి మరోసారి లాక్‌డౌన్‌ ను విధించనున్నారనే సమాచారం తాజాగా నెట్టింట్లో చక్కర్లు కొడుతోంది. దీన్ని అసత్య ప్రచారం మాత్రమేనని ప్రెస్‌ ఇన్ఫర్మేషన్‌ బ్యూరో (పీఐబీ) స్పష్టం చేసింది. ‘‘కొవిడ్‌-19 కేసులు తీవ్రమౌతున్న కారణంగా ప్రభుత్వం దేశంలో డిసెంబర్‌ 1 నుంచి మరోసారి లాక్‌డౌన్‌ విధించనుందని.. ఓ ప్రముఖ మీడియా సంస్థ సామాజిక మాధ్యమాల్లో ప్రచురించినట్టు ప్రచారం జరుగుతోంది. అయితే ఈ ట్వీట్‌ నకిలీది. ప్రభుత్వం ఆ విధమైన నిర్ణయాలేవీ తీసుకోలేదు’’ అని పీఐబీ ట్విటర్‌ ద్వారా ప్రకటించింది.