వైరల్‌: కళ్లముందే విరిగిపడిన కొండచరియ

ఇంటర్నెట్‌ డెస్క్‌: భారీ వర్షాలు లేదా భూకంపాలు సంభవించినప్పుడు కొండచరియలు విరిగి పడడం మనం చూస్తుంటాం. అలాంటిదేమీ లేకుండానే ఓ భారీ కొండచరియ విరిగి పడింది. సముద్ర తీరంలో సంభవించిన ఈ ఘటనతో కలకలం రేగింది. దీనికి సంబంధించిన వీడియో వైరల్‌గా మారింది. ఇటీవల స్పెయిన్‌లోని కానరీ ద్వీపంలోని లా గొమేరియా బీచ్‌లో సంభవించింది.

ఇక్కడి సముద్రం ఒడ్డున ఉన్న ఎత్తైన కొండ నుంచి కొంత మేరకు విడివడి నీటిలో పడిపోయింది. ఈ అనూహ్య ఘటనను ఓ ప్రత్యక్ష సాక్షి తన కెమెరాలో బంధించాడు. తొలుత కొద్దిగా మట్టి, రాళ్లు పడటం ఈ వీడియోలో చూడొచ్చు. అక్కడికి కొద్ది క్షణాల్లోనే పెద్ద భాగం సముద్రంలోకి కుప్పకూలిపోయింది. అనంతరం ఆ ప్రదేశంలో భద్రతా సిబ్బంది, జాగిలాల సాయంతో గాలింపు చర్యలు చేపట్టారు. ఆ ప్రాంతంలో నిషేధాజ్ఞలు విధించారు. ఇలాంటి ఘటన పునరావృతం కావచ్చని అధికారులు ప్రజలను హెచ్చరిస్తున్నారు. కానరీ ద్వీపాల అధ్యక్షుడు షేర్‌ చేసిన ఈ వీడియో కొన్ని లక్షల వ్యూస్‌ను సొంతం చేసుకుంది. ఆ దృశ్యాన్ని మీరూ చూసేయండి..