ఏడాది పాటు కొన‘సాగిన’ ప్రయాణం

కేరళకు చేరుకున్న జంబో ట్రక్కు

తిరువనంతపురం: మహారాష్ట్రలో ఏడాది క్రితం బయలుదేరిన ఓ భారీ ట్రక్కు, ఎట్టకేలకు కేరళ రాజధాని తిరువనంతపురం చేరుకుంది. సుదీర్ఘ కాలం పాటు సాగిన ఈ ప్రయాణానికి సంబంధించిన వివరాలు ఇలా ఉన్నాయి. మహారాష్ట్రలోని నాసిక్‌ నుంచి ‘ఏరోస్పేస్‌ హారిజాంటల్‌ ఆటోక్లేవ్‌’ అనే యంత్రాన్ని తిరువనంతపురంలో ఉన్న విక్రమ్‌ సారాభాయ్‌ అంతరిక్ష కేంద్రానికి తరలించాల్సి వచ్చింది. కాగా, ఈ భారీ యంత్రం 70 టన్నుల బరువు, 7.5 మీటర్ల ఎత్తు, 6.65 మీటర్ల వెడల్పు కలిగి ఉంది. ముఖ్యంగా ఎత్తు ప్రతిబంధకంగా మారటంతో.. ఇతర మార్గాల ద్వారా దీని తరలింపు అసాధ్యమైందని అందుకే రోడ్డు మార్గాన్ని ఎంచుకున్నట్టు అధికారులు వివరించారు.  

ఈ యంత్రంతో కూడిన ట్రక్కు నాసిక్‌లో జులై 2019న బయలుదేరి, ఈ ఉదయానికి తిరువనంతపురంలోని విక్రమ్‌ సారాభాయ్‌ అంతరిక్ష కేంద్రాన్ని చేరుకున్నట్టు అధికారులు తెలిపారు. 74 చక్రాలున్న ఈ భారీ ట్రక్కు నాలుగు రాష్ట్రాలను దాటుకుని 1500 కిలోమీటర్లు ప్రయాణించినట్టు వారు వివరించారు. ఈ ట్రక్కు 32 మంది సిబ్బందితో ప్రయాణించిందని.. ఎలాంటి ప్రమాదం జరుగకుండా జాగ్రత్తగా తీసుకొని వచ్చేందుకు ఇంత సమయం పట్టినట్టు అధికారులు తెలిపారు. సాధారణ రోడ్లపై ప్రయాణం కష్టమైనందు వల్ల, ఈ జంబో ట్రక్కు రోజుకు కేవలం ఐదు కిలోమీటర్లు మాత్రమే ప్రయాణించిందని వారు వెల్లడించారు. అంతేకాకుండా కరోనా వైరస్‌ లాక్‌డౌన్‌ ప్రభావం కూడా ఆలస్యానికి కారణమన్నారు.