17న నింగిలోకి పీఎస్‌ఎల్వీ సీ-50

బెంగళూరు: కమ్యూనికేషన్‌ ఉపగ్రహమైన సీఎంఎస్‌-01ను పీఎస్‌ఎల్వీ-సీ50 ద్వారా ఈ నెల 17న నింగిలోకి పంపనున్నట్లు భారత అంతరిక్ష పరిశోధనా సంస్థ (ఇస్రో) శుక్రవారం ప్రకటించింది. పీఎస్‌ఎల్వీ 52వ మిషన్‌ అయిన పీఎస్‌ఎల్వీ సీ-50ను శ్రీహరికోటలోని సతీశ్‌ధావన్‌ స్పేస్‌ సెంటర్‌ రెండో ప్రయోగవేదిక నుంచి ప్రయోగించనున్నారు. వాతావరణం అనుకూలిస్తే డిసెంబరు 17వ తేదీ, 15:41 గంటలకు ఈ ప్రయోగాన్ని నిర్వహించనున్నట్లు వారు తెలిపారు. ఈ సీఎంఎస్-01 ఫ్రీక్వెన్సీ స్ప్రెక్ట్రంలో విస్తరించిన సీ-బ్యాండ్‌ సేవలను అందించేందుకు నిర్దేశించిన ఉపగ్రహం. దీని పరిమితి భారత్‌తో పాటు, అండమాన్‌-నికోబార్‌ దీవులు, లక్షద్వీప్‌లకు విస్తరిస్తుంది. సీఎంఎస్‌ భారతదేశపు 42వ కమ్యునికేషన్‌ ఉపగ్రహం. పీఎస్‌ఎల్వీ-సీ50 ఎక్స్‌ఎల్‌ ఆకృతిలో 22వది అని ఇస్రో తెలిపింది. అంతేకాకుండా ఇది షార్‌ నుంచి 77వ మిషన్‌ అని వారు పేర్కొన్నారు.