విగ్రహానికి రాఖీ.. సోదరుడికి నివాళి

సిద్దిపేట: సోదరుడు మృతి చెందినా అతడిపై మమకారం మరిచిపోలేదు సోదరీమణులు. విగ్రహానికి రాఖీ కడుతూ ఏటా రక్షాబంధన్‌ నిర్వహించుకుంటున్నారు. తమ సోదరుడి జ్ఞాపకాలు గుర్తు చేసుకుంటూ కన్నీటి పర్యంతమవుతున్నారు.  
    సిద్ధిపేట జిల్లా అక్కన్నపేట మండలం రాజుతండాకు చెందిన గుగులోతు లింగయ్య, వీరమ్మ దంపతులకు నలుగురు సంతానం. కుమారుడు నరసింహనాయక్‌ సీఆర్‌పీఎఫ్ జవాన్‌గా పని చేసేవారు. 2014లో చత్తీస్‌గఢ్‌లో మావోయిస్టులు అమర్చిన మందుపాతరకు బలయ్యాడు. అతని గుర్తుగా తల్లిదండ్రులు పొలం వద్ద విగ్రహాన్ని ఏర్పాటు చేసుకున్నారు. స్వాతంత్ర్య, గణతంత్ర దినోత్సవాల రోజున జాతీయ పతాకం ఎగురవేస్తూ కుమారుడికి నివాళి అర్పిస్తున్నారు.  రాఖీ పండుగ వచ్చిందంటే  ముగ్గురు సోదరీమణులు కన్నీటి పర్యంతమవుతున్నారు. సోదరుడి విగ్రహానికి రాఖీ కట్టి అనుబంధాన్ని చాటుకుంటున్నారు.