Odisha: కరోనా వైరస్‌ ఆకారంలో దోసకాయ!

భువనేశ్వర్‌: ఒడిశాలోని ఓ రైతు పొలంలో.. కరోనా వైరస్ ఆకారంలో దోసకాయ కాసింది. నవరంగ్‌పుర్ జిల్లా సారగూడ గ్రామానికి చెందిన రవి కిరణ్ నాగ్ అనే రైతు పొలంలో... ఈ వింత దోసకాయ కాసింది. అన్ని దోసకాయలూ మామూలుగానే ఉండగా.. ఒక్కటి మాత్రం విభిన్నంగా ఉంది. కరోనా వైరస్‌ను పోలినట్లుగానే దీనిపై కొమ్ముల లాంటి ఆకారాలు ఉన్నాయి. వింత ఆకారంలో ఉన్న దోసకాయను ఫొటో తీసిన రవి కిరణ్.. సామాజిక మాధ్యమాల్లో పోస్టు చేశాడు. వాటిని సామాజిక మాధ్యమాల్లో నెటిజన్లు తెగ షేర్ చేస్తున్నారు. ఈ దోసకాయను చూసేందుకు చాలా మంది పొలం వద్దకు సైతం వస్తున్నారని రవి కిరణ్ చెబుతున్నాడు. దోసకాయతో సెల్ఫీలు దిగేందుకు పలువురు ఆసక్తి చూపుతున్నట్టు తెలిపాడు.