​​​​​​Free Wi-fi: ఉచిత వైఫై @ 6000 స్టేషన్స్‌

దిల్లీ: భారతీయ రైల్వే మరో మైలురాయి అందుకుంది. డిజిటల్‌ ఇండియాలో భాగంగా ఏర్పాటు చేస్తున్న ఈ సేవలు ఇప్పటి వరకు ఆరువేల స్టేషన్లకు విస్తరించాయి. ఝార్ఖండ్‌లోని హజీర్‌బాగ్‌ స్టేషన్‌లో శనివారం ఈ సేవలను ప్రారంభించడం ద్వారా భారతీయ రైల్వే ఈ మైలురాయిని చేరుకుంది.

ఫ్రీ వైఫై సేవలు తొలిసారి 2016లో ముంబయి రైల్వేస్టేషన్‌లో ప్రారంభమయ్యాయి. అనంతరం దేశంలోని ప్రధాన స్టేషన్లకు ఈ సేవలను విస్తరించారు. పశ్చిమ బెంగాల్‌లోని మిడ్నాపూర్‌ స్టేషన్‌ 5000వ స్టేషన్‌గా నిలిచింది. పట్టణ, గ్రామీణ అనే తేడా లేకుండా అందరికీ ఈ సేవలు అందించడమే లక్ష్యమని రైల్వే తెలిపింది. గూగుల్‌, డీవోటీ, పవర్‌ గ్రిడ్‌ కార్పొరేషన్‌ ఆఫ్‌ ఇండియా, టాటా ట్రస్ట్‌ సహకారంతో రైల్వే శాఖకు చెందిన రైల్‌టెల్‌  వీటిని ఉచితంగా ఏర్పాటు చేస్తోంది.