స్విమ్మింగ్‌పూల్‌లో కారు.. అసలేం జరిగిందంటే!

ఇంటర్నెట్‌డెస్క్‌: ఇటీవల స్విమ్మింగ్‌పూల్‌లో కారు మునిగిన దృశ్యానికి సంబంధించి కొన్ని ఫొటోలు సామాజిక మాధ్యమాల్లో వైరల్‌గా మారాయి. ఇంతకీ ఆ కారు నీటిలోకి ఎలా వచ్చింది.. ఎందుకు వచ్చిందని నెటిజన్లు ఆశ్చర్యపోతున్నారు. యూఎస్‌లోని ఫ్లోరిడా వెస్ట్‌ పామ్‌ బీచ్‌ పోలీసులు ఈ ఫొటోలను ఫేస్‌బుక్‌లో పోస్ట్‌ చేశారు. పోలీసులు తెలిపిన వివరాల ప్రకారం.. ఒక యువతి ఇటీవల కారులో ఫ్లోరిడాలోని ఓ హోటల్‌కు వచ్చింది. ఆమె కారు నడుపుతూ అక్కడికి వచ్చినపుడు అకస్మాత్తుగా దానిపై నియంత్రణ కోల్పోయింది. ఈ క్రమంలో కారు అక్కడే ఉన్న స్విమ్మింగ్‌పూల్‌లోకి దూసుకెళ్లి అందులో పడి మునిగిపోయింది. వెంటనే ఆమె కారు వెనక భాగం నుంచి డోర్‌ తెరుచుకుని బయటపడడంతో ప్రాణాపాయం తప్పింది. అయితే ఈ ఘటనకు సంబంధించిన చిత్రాలు అందరినీ ఆకర్షిస్తుండటంతో సామాజిక మాధ్యమాల్లో వైరల్‌గా మారాయి. ‘కార్‌ పూలింగ్‌’ అంటూ ఒకరు..  ‘ఈ రోజుల్లో కారు డ్రైవర్లకు కూడా స్విమ్‌సూట్‌ కావాలంటూ’ మరొకరు ఇలా నెటిజన్లు రకరకాలుగా చమత్కరించారు.