మీ సందేశం ఇలా కూడా చెప్పొచ్చు..

ఇంటర్నెట్‌డెస్క్‌: ఈ మధ్య కాలంలో సామాజిక మాధ్యమాల వేదికగా ఒకరినొకరు ఛాలెంజ్‌లు విసురుకోవడం సర్వసాధారణమైంది. అదీ టిక్‌టాక్‌లో అయితే మరీ ఎక్కువైంది. అందులో కొన్ని సరదాగా ఉంటే, మరి కొన్ని ప్రాణాలకు హాని కలిగించే విధంగా ఉన్నాయి. ఇప్పుడు మరో కొత్త ఛాలెంజ్‌ తెర మీదకు వచ్చి వైరల్‌గా మారింది. దీని పేరు పేపర్‌ టవల్‌ ఛాలెంజ్‌. ఈ ఛాలెంజ్‌ ఏమిటంటే... ఓ పేపరు టవల్‌(పెద్ద టిస్యూ పేపరు)లో రహస్య సందేశాలని రాసి, దాన్ని నీళ్లతో నింపిన వాష్‌ బేసిన్‌లో పడేయాలి. అంతే పడిసిన తర్వాత రహస్య సందేశం కనిపిస్తుంది. అయినా ఇదెలా సాధ్యం అనుకుంటురా? పేపరు టవల్‌ని రెండుగా మడిచి, లోపలున్న మడతలో మీ రహస్య సందేశాన్ని రాస్తారు. పేపరు టవల్‌ నీటిలో తడిసినప్పుడు మీ సందేశం కనిపిస్తుంది అంతే. ఇలా ఈ ఛాలెంజ్‌ నెటిజన్లను ఎంతగానో ఆకట్టుకుంటోంది. దీంతో సరదాగా ఒకరినొకరు ఛాలెంజ్‌ విసురుకుంటుండంతో వైరల్‌గా మారింది.