జనతా కర్ఫ్యూపై జనం మాట 

ఇంటర్నెట్‌ డెస్క్‌: ప్రపంచంలో కల్లోలం సృష్టిస్తున్న కరోనా మహమ్మారిని తరిమికొట్టేందుకు భారత్‌ పెద్ద యుద్ధమే ప్రకటించింది. యావత్‌ భారతావని చరిత్రలో కనీవినీ ఎరుగని రీతిలో చేపట్టిన ఈ జనతా కర్ఫ్యూలో దేశ ప్రజలంతా భాగస్వాములై విజయవంతం చేశారు. ఈ వైరస్‌ గొలుసును ఛేదించడమే లక్ష్యంగా ప్రధాని నరేంద్ర మోదీ ఇచ్చిన పిలుపును తూ.చ. తప్పకుండా పాటించిన జనం తమ సామాజిక బాధ్యతను చాటిచెప్పారు. తద్వారా ప్రపంచానికి ఐక్యతా గళం వినిపించారు. జనతా కర్ఫ్యూపై నెటిజన్ల స్పందనలు కోరుతూ ఈనాడు.నెట్‌ ఇచ్చిన పిలుపునకు నెటిజన్ల నుంచి అపూర్వమైన స్పందన లభించింది. ఈ కర్ఫ్యూను మరిన్ని రోజులు పొడిగించడంతో పాటు ప్రజలు వ్యక్తిగత పరిశుభ్రతను పాటించి బాధ్యతగా వ్యవహరించడం వల్లే ఈ మహమ్మారిని తరిమికొట్టడం సాధ్యమవుతుందని స్థూలంగా నెటిజన్లు తమ అభిప్రాయాలను వ్యక్తంచేశారు. వారి అభిప్రాయాల తరహాలోనే తెలుగు రాష్ట్రాలు ఈ నెల 31వరకు లాక్‌డౌన్‌ ప్రకటించడం విశేషం. ప్రపంచ వ్యాప్తంగా ఇప్పటివరకు సుమారు 13వేల మందిని పొట్టనబెట్టుకున్న కొవిడ్‌-19 మహమ్మారిని తరిమికొట్టేందుకు తీసుకోవాల్సిన జాగ్రత్తలను చెబుతూ వేలాది మంది నెటిజన్లు కామెంట్లు పోస్ట్‌ చేశారు. వారందరికీ ఈనాడు.నెట్‌ తరఫున కృతజ్ఞతలు. అందరి స్పందనలూ ఇవ్వలేకపోయినా స్థూలంగా వ్యక్తమైన అభిప్రాయాల సమాహారం ఇదీ.. 

* ‘‘మార్చి 31 వరకు జనతా కర్ఫ్యూని పొడిగిస్తే కరోనా వైరస్‌ వ్యాప్తిని చాలా వరకు అరికట్టవచ్చు. ఇలాంటి మంచి ఆలోచన చేసిన మన ప్రధాని మోదీ గారికి హ్యాట్సాఫ్‌!’’

*  ‘‘ప్రధాని తీసుకున్న నిర్ణయం చాలా గొప్పది. ప్రజలంతా స్వచ్ఛందంగా పాల్గొనడం అభినందనీయం. కానీ, ఈ ఒక్కరోజే సరిపోదు. ఈ కర్ఫ్యూని కనీసం రెండు వారాలు పాటించాల్సిన అవసరం ఉంది. నిత్యావసరాలకు సంబంధించిన సంస్థలను మాత్రమే అనుమతించాలి. మన లక్ష్యం ఒక్కటే. కొవిడ్‌-19 వైరస్‌ను ఛేదించి దేశాన్ని కాపాడుకోవడమే’’ 

*  ‘‘వస్తువులను తాకొద్దని ప్రజలకు అవగాహన కల్పించాలి. అపార్టుమెంట్లలో తలుపులు తెరిచేటప్పుడు సాధ్యమైతే టిష్యూ/ పేపర్లను వాడండి. లిఫ్ట్‌లను ఆన్‌ చేసేందుకు టూత్‌ పిక్స్‌ వాడండి. వాడిన వెంటనే వాటిని చెత్తబుట్టలో వేయండి. అంతేగానీ వాటిని స్నానపు గదుల్లో, పైపులకు అడ్డంగా వేయొద్దు. అత్యవసరమైతే తప్ప బయటకు వెళ్లొద్దు. నిత్యావసరాలు, మందులు తెచ్చేందుకు వృద్ధులకు సాయం చేయండి’’

*  ‘‘కరోనాను తరిమికొట్టేందుకు జనతా కర్ఫ్యూ ఒక్క రోజు పాటిస్తే చాలదు. దీనికి మూడు, నాలుగు వారాలు అవసరం. కరోనాను కట్టడి చేసేందుకు ప్రజలంతా ఐక్యంగా నిలిచేలా చేసిన ఈ కార్యక్రమం చాలా బాగుంది. జనతా కర్ఫ్యూ అర్థం భారత్‌ నుంచి వైరస్‌ను తరిమికొట్టడం. జయహో జనతా కర్ఫ్యూ.. జైహింద్‌!’’

* ‘‘ఒకరోజు కర్ఫ్యూతో సమస్య పరిష్కారం కాదు. విదేశాల నుంచి వచ్చిన వారు బాధ్యతతో వ్యవహరించి అక్కడి ప్రభుత్వాలకు సమాచారం ఇచ్చి నిర్బంధంలోకి వెళ్లాలి. రెండోది.. ప్రతిఒక్కరూ శుభ్రత పాటించాలి. దాంతో పాటు సామాజిక దూరం పాటించాలి. ఇలా కనీసం రెండు వారాలు పాటిస్తే చాలు. అందువల్ల కరోనాపై పోరాటం సాగించడం ప్రతి ఒక్కరూ ఒక బాధ్యతగా తీసుకొని పనిచేయాలి’’

*  ‘‘మంచి నిర్ణయం. మనుషులంతా ఇలా ఐక్యంగా ఉండి పట్టుదలతో తమని తాను కాపాడుకుంటూ సమాజాన్ని కాపాడేలా పనిచేస్తే కరోనానే కాదు దేన్నయినా పరిష్కరించుకోగలం’’

* ‘‘కరోనా కట్టడికి ఇదో మంచి చర్య. 52 ఏళ్ల పైబడిన వాళ్లకు తెలంగాణ ప్రభుత్వం ఇంటి నుంచే పనిచేసేలా, లేదంటే సెలవులు ఇచ్చేలా చర్యలు తీసుకోవాలని కోరుతున్నా’’

పూర్తి స్పందనల కోసం క్లిక్‌ చేయండి