తగ్గిన శానిటైజర్ల ధరలు

దిల్లీ: దేశంలోని నిత్యావసరాల తయారీ కంపెనీలు (ఎఫ్‌ఎంసీజీ) ప్రభుత్వ ఆదేశాలకు అనుగుణంగా హ్యాండ్‌ శానిటైజర్ల (చేతులు శుభ్రం చేసుకునే ద్రావణాల) ధరలను తగ్గించాయి. కొవిడ్‌-19 భయాల నేపథ్యంలో దేశవ్యాప్తంగా హ్యాండ్‌ శానిటైజర్లకు ఏర్పడిన గిరాకీని అందుకునేందుకు ఉత్పత్తిని పెంచినట్లు చెప్పాయి. తీవ్రమైన ఆరోగ్య సంక్షోభం నెలకొన్న తరుణంలో జాతికి అండగా ఉంటామని హ్యాండ్‌ శానిటైజర్ల తయారీ కంపెనీలైన ఆర్‌బీ, హెచ్‌యూఎల్‌, ఐటీసీ, గోద్రెజ్‌ కన్జ్యూమర్‌, హిమాలయ, డాబర్‌లు స్పష్టం చేశాయి. 200 మిల్లీ లీటర్ల హ్యాండ్‌ శానిటైజర్‌ గరిష్ఠ ధరను రూ.100కు పరిమితం చేస్తూ కేంద్ర ప్రభుత్వం శనివారం ఆదేశాలు జారీచేసిన సంగతి తెలిసిందే. ఈ ధర జూన్‌ 30వరకు అమల్లో ఉండనుంది.