పాక్‌ నకిలీ ఆరోగ్య సేతు యాప్‌తో జాగ్రత్త!

సైనిక సిబ్బందికి ఉన్నతాధికారుల హెచ్చరిక

దిల్లీ: నకిలీ ఆరోగ్య సేతు యాప్‌ ద్వారా చరవాణులను హ్యాక్‌ చేసేందుకు కొన్ని పాకిస్థానీ ఏజెన్సీలు కుట్ర పన్నుతున్నాయని ఈ విషయంలో భారత సైనిక సిబ్బంది అప్రమత్తంగా ఉండాలని ఉన్నతాధికారులు హెచ్చరించారు. పొరుగు దేశం నుంచి వివిధ నకిలీ యాప్‌లు భారత మిలిటరీ వర్గాలకు చెందిన వాట్సాప్‌ గ్రూప్స్‌లోకి వస్తున్నాయని చెప్పారు. దీంతోపాటు సామాజిక మాధ్యమాల్లో భారతీయ పేర్లతో నకిలీ ఖాతాలు సృష్టించి ఇక్కడి వారిని లక్ష్యంగా చేసుకుంటున్నట్లు ఓ ఉన్నతాధికారి వెల్లడించారు. ఇటీవల అనోష్క చోప్రా పేరు మీద ఓ పాక్‌ ఇంటెలిజెన్స్‌ బృందం భద్రతా సిబ్బందికి ప్రమాదకార యాప్‌ను పంపినట్లు తెలిపారు. ఆరోగ్య సేతు యాప్‌ను ప్రభుత్వ అధికారిక వెబ్‌సైట్‌ నుంచి లేదా గూగుల్‌ ప్లేస్టోర్‌, ఐఓఎస్‌ నుంచి మాత్రమే డౌన్‌లోడ్‌ చేసుకోవాలని సూచించారు.