‘కింగ్‌ కోబ్రా’కు స్నానం..వీడియో వైరల్‌

ఇంటర్నెట్‌డెస్క్‌: సాధారణంగా పాము కనబడితే మనలో సన్నగా వణకు మొదలవుతుంది. అలాంటిది సుమారు 14  అడుగులున్న కింగ్‌ కోబ్రా దగ్గరకు వెళ్లి, దానికి స్నానం చేయించడమంటే..అమ్మో ఇంకేమన్నా ఉందా..! అయితే ఈ వీడియో చూస్తే మాత్రం మీరు ఆశ్చర్యపోక తప్పదు. సామాజిక మాధ్యమాలలో ప్రస్తుతం హల్‌చల్‌ చేస్తున్న  ఈ వీడియోను భారత అటవీశాఖ అధికారి సుశాంత్‌నందా ఆదివారం తన ట్విట్టర్‌ఖాతాలో  పోస్ట్‌ చేశారు. ఆ వీడియోలో ఓ వ్యక్తి కింగ్‌ కోబ్రాకు దగ్గర్లోని కుళాయి నీటిని బకెట్‌లో పట్టి స్నానం చేయిస్తున్నాడు. కోబ్రా సైతం ఆ స్నానాన్ని ఆస్వాదిస్తూ సేద తీరడం గమనార్హం. ఈ క్రమంలోనే సదరు వ్యక్తి కోబ్రా తలపై నిమురుతూ కనిపించాడు. ఈ దృశ్యాన్ని సుశాంత్‌నందా ప్రస్తావిస్తూ ఆ వ్యక్తి సర్పాలను నియంత్రించడంలో అనుభవం  ఉన్నవాడని, దయచేసి ఎవ్వరూ ఇటువంటివి అనుకరించవద్దని, ఈ కృత్యం అత్యంత ప్రమాదకరమని విజ్ఞప్తి చేశారు. ఆ వీడియోను మీరూ చూసేయండి మరి!