‘గిన్నిస్‌ వరల్డ్‌ రికార్డ్స్‌ డే’ రికార్డులివి!

అదరగొట్టిన భారతీయులు

(Photo:Guinness World Records.com)

ఇంటర్నెట్‌ డెస్క్‌: గిన్నిస్‌ బుక్‌ ఆఫ్‌ వరల్డ్‌ రికార్డ్స్‌ గురించి తెలియని వారుండరు. చాలా మంది ఈ గిన్నిస్‌ బుక్‌లో చోటు సంపాదించడం కోసం అనేక ప్రయత్నాలు చేస్తుంటారు. వినూత్న, విభిన్న పనులు చేసి రికార్డు సాధిస్తుంటారు. అలా రికార్డు నెలకొల్పిన వారి గురించి గిన్నిస్‌ సంస్థ.. తమ రికార్డు బుక్‌లో ప్రచురిస్తుంటుంది. అలాగే ఈ సంస్థ ఏటా నవంబర్‌ 18న గిన్నిస్‌ వరల్డ్‌ రికార్డ్స్‌(జీడబ్ల్యూఆర్‌)డే పేరుతో వేడుక నిర్వహిస్తుంటుంది. ఇటీవల దుబాయ్‌ వేదికగా జరిగిన ఈ వేడుకల్లో ప్రపంచవ్యాప్తంగా కొందరు కొన్ని విభాగాల్లో రికార్డులు సృష్టించారు. భారతీయులూ పలు రికార్డులు సాధించడం విశేషం. అవేంటో చూద్దామా..!

* ఆంధ్రప్రదేశ్‌ నెల్లూరు జిల్లాకి చెందిన ప్రభాకర్‌రెడ్డి తలతో ఒక్క నిమిషంలో 68 కూల్‌డ్రింక్స్‌ మూతలు తీసి గిన్నిస్‌ రికార్డు సృష్టించాడు. అతడికి సుజిత్‌ కుమార్‌, రాకేశ్‌ సహకరించారు. 

* భారత్‌కు చెందిన రామ్‌కుమార్‌ సారంగపాణి ఏకంగా ఆరు రికార్డులు బద్దలుకొట్టాడు. దుబాయ్‌లో జరిగిన కార్యక్రమంలో ఈ రికార్డులు సాధించాడు.

 - అత్యంత చిన్న సైజు పేకముక్కలను తయారు చేశాడు. వాటి సైజు కేవలం 7మి.మీ×5మి.మీ×4.86మి.మీ

 - అయస్కాంతాలతో అతి పెద్ద వాక్యం రూపొందించాడు. 50,102 అయస్కాంత ముక్కలతో ‘I LOVE U.A.E’ అని రాశాడు.

 - అయస్కాంతాలతో అతి పెద్ద పదం ‘DUBAI’ రూపొందించి మరో రికార్డు సాధించాడు. ఇందుకోసం 50,020 అయస్కాంత ముక్కలను వినియోగించాడు.

 - బ్యాంక్‌ నోట్లతో అతి పెద్ద పదం ‘UAE’ని రాశాడు. దీనికి 3,040 నోట్లను ఉపయోగించాడు. 

 - 5,005 బ్యాంక్‌ నోట్లతో అతి పెద్ద వాక్యం ‘GWR DAY 2020’ని పేర్చి గిన్నిస్‌ రికార్డు సాధించాడు. 

 - అతి పెద్ద ఎలక్ట్రానిక్‌ గ్రీటింగ్‌ కార్డు రూపొందించి మరో రికార్డు కొట్టాడు. ఈ గ్రీటింగ్‌ కార్డు సైజు 12చ.మీటర్లు

* భారత్‌లోని చెన్నైకి చెందిన హూపర్స్‌ గ్రూప్‌ సభ్యులు పలు రికార్డులు సాధించారు. 

 - ఆర్‌.ఎస్‌ తరుణ్‌ 6నిమిషాల 7సెకండ్లు స్కేటింగ్‌ చేస్తూ హూలా హూప్స్‌ రింగులను తిప్పి.. ఎక్కువసేపు స్కేటింగ్‌ చేస్తూ రింగులను తిప్పిన వ్యక్తిగా రికార్డు నెలకొల్పాడు.

 - ఎస్‌. కనిష్క నేలపై పడుకొని కాళ్లతో 136 రింగులను తిప్పి మరో రికార్డు సృష్టించారు.

 - ఎం.ఎస్‌ హాసినీ ఒక్క నిమిషంలో అత్యధికంగా 99 వాహనాల లోగోలను గుర్తించారు.

* చెన్నైలోనే గోకుల్‌నాథ్‌ యూనిక్‌ టాలెంట్‌ అకాడమీ నుంచి గిన్నిస్‌ బుక్‌లో మూడు రికార్డులు నమోదయ్యాయి.

 - గోకుల్‌నాథ్‌ ఒక్క నిమిషంలో అత్యధిక 77 పొయ్‌ ఎయిర్‌ రాప్స్‌ చేశాడు.

 - కె. నాగరాజు ఒక్క నిమిషంలో 2 కేజీల బరువున్న హూలా హూప్‌ రింగులను 144 సార్లు తిప్పాడు.

 - ఎస్‌. రియన్నా ఆండ్రియా, ఆండ్రియా వార్గేసి, ఏ.ఎస్‌. ఐశ్వర్య ఈ ముగ్గురు కలిసి హూలా హూప్‌ను ఒక్కనిమిషంలో 66సార్లు తిప్పారు. మోస్ట్‌ రోటేషన్‌ ఆఫ్‌ హూలా హూప్‌ బై త్రీ మెంబర్స్‌ కేటగిరీలో ఈ రికార్డు నెలకొల్పారు.

* దక్షిణాఫ్రికాకు చెందిన థామస్‌ బట్లర్‌ వాన్‌ టొండర్‌ అత్యంత వేగంగా 50 మీటర్ల తాడును ఎక్కేశాడు. ఆ తాడు ఎక్కడానికి అతడు తీసుకున్న సమయం కేవలం 3 నిమిషాల 19.68సెకండ్లు. 

* చైనాకు చెందిన రెన్‌ కెయూ వయసు పద్నాలుగు. ఎత్తు మాత్రం 7 అడుగుల 3.02 అంగుళాలు. గిన్నిస్‌ రికార్డు సంస్థ రెన్‌ను అత్యంత పొడవైన టీనేజీ కుర్రాడిగా గుర్తించింది. 

* రష్యాకి చెందిన ఆండ్రే మాస్లోయ్‌ రూబిక్‌ క్యూబ్‌ ఆడుతూ అత్యంత ఫాస్ట్‌గా వంద మీటర్లు పరుగెత్తిన వ్యక్తిగా రికార్డు సాధించాడు.

* యూకేకి చెందిన మార్టిన్‌ రీస్‌ నీళ్లలో మునిగి మూడు నిమిషాల్లో అత్యధిక మ్యాజిక్‌ ట్రిక్స్‌ చేసి చూపించి రికార్డు కొట్టాడు. 

ఇలాంటి రికార్డులు మరికొన్ని ఈ వీడియోలో చూడండి.