గూగుల్‌ను నమ్ముకుంటే.. వధువే మారిపోయింది

జకార్తా: గూగుల్‌ మ్యాప్స్‌ను నమ్ముకుని, పెళ్లింటి చిరునామా వెతుక్కుంటూ వెళ్లిన వరుడు.. అదే ప్రాంతంలోని మరో వధువు చెంతకు చేరుకున్నాడు. ఇక పెళ్లే తరవాయి అనుకునేంతలోనే తాము వచ్చింది వేరొకరి ఇంటికని తెలుసుకొని నాలుక్కరుచుకున్నారు. ఇండోనేసియాలో జరిగిన ఈ సంఘటన సామాజిక మాధ్యమాల్లో వైరల్‌ అయింది. సెంట్రల్‌ జావాలోని లొసారి హామ్లెట్‌లో వధువు ఇంటికి బయలుదేరిన వరుడు, అతని బంధువులు గూగుల్‌ మ్యాప్స్‌ను నమ్ముకున్నారు. 

అది అక్కడికి సమీపంలోనే ఉన్న జెంగ్‌కోల్‌ హామ్లెట్‌ అనే మరో గ్రామానికి తీసుకెళ్లింది. అక్కడా ఓ పెళ్లిమండపం, హడావుడి ఉండటంతో సరాసరి అందులోకి వెళ్లారు. నిజానికి అక్కడ మారియా అనే అమ్మాయికి బుర్హాన్‌తో అనే యువకుడితో నిశ్చితార్థం జరగాలి. వారంతా బుర్హాన్‌ బంధువుల కోసం చూస్తుండగా.. ‘‘గూగుల్‌ బృందం’’ వచ్చేసింది. కాసేపు అంతా సవ్యంగానే జరుగుతోందని అందరూ అనుకున్నారు. అయితే ఏకంగా పెళ్లిదుస్తులు, సరంజామాతో వచ్చిన వారిని చూసి మారియా అప్రమత్తమైంది. వచ్చినవారు తన కోసం వచ్చిన వారు కాదని చెప్పడంతో అంతా అవాక్కయ్యారు. వచ్చినవారు కూడా తాము మరోచోటకు వచ్చినట్టు గుర్తించారు. అక్కడినుంచి బయలుదేరి అసలు పెళ్లిమండపానికి వెళ్లారు.