Andhra News: ఎమ్మెల్సీ అనంతబాబును సాయంత్రంలోగా అరెస్ట్‌ చేయాలి: కేవీపీఎస్‌

కాకినాడ: వైకాపా ఎమ్మెల్సీ అనంతబాబు మాజీ డ్రైవర్‌ సుబ్రహ్మణ్యం అంత్యక్రియలు పూర్తి అయ్యాయి. కాకినాడ జీజీహెచ్‌లో పోస్టుమార్టం అనంతరం తెల్లవారుజామున సుబ్రహ్మణ్యం మృతదేహాన్ని స్వగ్రామం తూర్పు గోదావరి జిల్లా జి.మామిడాడకు తరలించారు. మృతదేహానికి కుల వివక్ష పోరాట సమితి(కేవీపీఎస్‌) నాయకులు నివాళులు అర్పించారు. వైకాపా ప్రభుత్వ తీరుపై మండిపడ్డారు. సాయంత్రంలోగా ఎమ్మెల్సీ అనంతబాబును అరెస్ట్‌ చేయాలని డిమాండ్‌ చేశారు. లేనిపక్షంలో రేపు రాష్ట్ర వ్యాప్తంగా ఆందోళనలు చేపడతామని హెచ్చరించారు.

సుబ్రహ్మణ్యం రోడ్డుప్రమాదంలో చనిపోయాడని ఎమ్మెల్సీయే తన కారులో తీసుకొచ్చి కుటుంబ సభ్యులకు అప్పగించిన ఘటన రాష్ట్రవ్యాప్తంగా చర్చనీయాంశమైన విషయం తెలిసిందే. సుబ్రహ్మణ్యంను ఎమ్మెల్సీయే హత్య చేశాడని.. ఆయన్ను అరెస్ట్ చేయాలని నిన్న అర్ధరాత్రి వరకు కుటుంబసభ్యులు శవపరీక్షకు ఒప్పకోలేదు. ఎమ్మెల్సీని అరెస్ట్‌ చేస్తామని స్థానిక ఎస్పీ హామీ ఇవ్వడంతో అర్ధరాత్రి తర్వాత సుబ్రహ్మణ్యం మృతదేహానికి పోస్టుమార్టం చేసి స్వగ్రామానికి తరలించారు.