Anand Mahindra: ఆ వ్యసనాల నుంచి బయటపడటం తెలుసుకోవాల్సిందే..!

నెట్టింట్లో వీడియో షేర్ చేసి, వ్యాపార సూత్రం చెప్పిన మహీంద్రా

ముంబయి: ప్రముఖ వ్యాపారవేత్త ఆనంద్ మహీంద్రా నెట్టింట్లో ఏదైనా షేర్ చేశారంటే.. అందులో కచ్చితంగా ఆలోచింపజేసే విషయం ఉంటుంది. తాజాగా ఓ శునకానికి సంబంధించిన వీడియో పంచుకొని, దాని ద్వారా వ్యాపార సూత్రాన్ని వెల్లడించారు. చూడటానికి నవ్వు తెప్పించేదిగానే ఉన్నప్పటికీ.. అలవాటు అనేది మనకు ఎంతలా వ్యసనంగా మారుతుందో తెలియజేశారు. 

ఆ వీడియోలో యజమాని తన శునకం సులభంగా బయటకు వెళ్లేందుకు ఏర్పాటు చేసినప్పటికీ.. రోజులాగే తలుపు తీసేవరకు అది అక్కడే ఎదురుచూడటం మనకు కనిపిస్తుంది. ఆ వ్యక్తి తలుపు తీసిన తర్వాతే అది బయటకు వెళ్తుంది. కొత్తగా వచ్చిన మార్పు ఎదురుగా కనిపిస్తున్నప్పటికీ.. ఇన్ని రోజులుగా ఉన్న అలవాటు నుంచి అది బయటకు రాలేకపోయింది. ఆనంద్‌ మహీంద్రా ఈ వీడియోను నెట్టింట్లో పంచుకుంటూ ఇలా రాసుకొచ్చారు. ‘ఒక అలవాటు మనకెంత వ్యసనంగా మారిందో వివరించేందుకు ఇంతకంటే మంచి మార్గం మరొకటి ఉండదు. ఆ అలవాటు నుంచి ఎలా విముక్తి పొందాలో తెలుసుకోవడమే ఈనాటి విలువైన వ్యాపార సూత్రం’ అంటూ కొన్ని అనవసరమైన అలవాట్ల నుంచి బయపడాల్సిన ఆవశ్యతను వివరించారు.