Vemulawada: వేములవాడలో కూలిన నిర్మాణంలో ఉన్న వంతెన

వేములవాడ: రాజన్న సిరిసిల్ల జిల్లా వేములవాడ బస్టాండ్‌ నుంచి ఆలయానికి వెళ్లే దారిలో నిర్మాణంలో ఉన్న వంతెన కూలిపోయింది. మూలవాగుపై కొత్తగా బ్రిడ్జి నిర్మాణం కోసం సెంట్రింగ్‌ పనులు జరుగుతున్నాయి. గత మూడు రోజులుగా కురుస్తున్న వర్షాలకు మూలవాగు ఉద్ధృతంగా ప్రవహిస్తుండటంతో బ్రిడ్జి నిర్మాణం కోసం చేపట్టిన సెంట్రింగ్‌ కుప్పకూలింది. వేములవాడ రాజన్న దర్శనం కోసం వచ్చే భక్తుల రాకపోకలకు వేర్వేరుగా ఇన్‌, అవుట్‌ రహదారులు ఉండాలనే ఉద్దేశంతో దాదాపు ఐదేళ్ల క్రితం రూ.28 కోట్లతో వంతెన నిర్మాణం మొదలుపెట్టారు. నిర్మాణ దశలోనే వంతెన కూలిపోవడంపై అధికారుల నిర్లక్ష్యంపై విమర్శలు వస్తున్నాయి.