Viveka Murder Case: మా నాన్నకు ఎలాంటి సంబంధం లేదు: చైతన్యరెడ్డి  

కడప: మాజీ మంత్రి వైఎస్‌ వివేకానందరెడ్డి హత్య కేసులో సీబీఐ విచారణ కొనసాగుతోంది. ఈ కేసులో అనుమానితుడిగా ఉన్న దేవిరెడ్డి శివశంకర్‌రెడ్డిని నిన్న హైదరాబాద్‌లో సీబీఐ అరెస్టు చేసిన విషయం తెలిసిందే. ఉస్మానియాలో వైద్య పరీక్షలు చేసిన తర్వాత అతడిని మేజిస్ట్రేట్‌ ముందు హాజరుపరిచారు. న్యాయమూర్తి అనుమతించడంతో ట్రాన్సిట్‌ వారెంట్‌పై శివశంకర్‌రెడ్డిని ఈ ఉదయం 10గంటలకు కడపకు తీసుకురానున్నారు. మధ్యాహ్నంలోపు పులివెందుల కోర్టులో సీబీఐ ఆయనను హాజరుపరచనుంది.

మరోవైపు న్యాయం చేయాలని కోరుతూ సీబీఐకి శివశంకర్‌రెడ్డి కుమారుడు చైతన్యరెడ్డి లేఖ రాశారు. ‘‘వివేకా హత్య కేసులో మా తండ్రికి ఎలాంటి సంబంధం లేదు. కేవలం ఆరోపణలతోనే మా నాన్నను అరెస్టు చేశారు. ఈ నెల 15న ఆయన ఎడమ భుజానికి సర్జరీ జరిగింది. ఇంకా వైద్యచికిత్స తీసుకోవాల్సిన అవసరం ఉంది. అనారోగ్యంతో ఉన్నందున న్యాయం చేయాలని సీబీఐకి విజ్ఞప్తి’’ అని చైతన్యరెడ్డి లేఖలో పేర్కొన్నారు.