Cm KCR: చిన్నారికి సీఎం కేసీఆర్‌ నామకరణం.. ఏం పేరు పెట్టారో తెలుసా?

రామడుగు: కరీంనగర్‌ జిల్లా పర్యటనకు వచ్చిన సీఎం కేసీఆర్‌ ఓ చిన్నారికి నామకరణం చేశారు. పర్యటనలో భాగంగా కరీంనగర్‌ కలెక్టరేట్‌లో దళితబంధు అమలుపై మంత్రులు, ఉన్నతాధికారులతో సమీక్ష నిర్వహించారు. సమీక్ష అనంతరం కరీంనగర్‌ జిల్లా రామడుగు ఎంపీపీ కలిగేటి కవిత, లక్ష్మణ్‌ దంపతులు సీఎం కేసీఆర్‌ను కలిసి తమ కుమారుడికి పేరు పెట్టాలని కోరారు. చిన్నారిని ఆప్యాయంగా చేతుల్లోకి తీసుకున్న సీఎం కేసీఆర్‌.. దంపతులకు శుభాకాంక్షలు తెలుపుతూ చిన్నారికి ‘తారక రామారావు’గా నామకరణం చేశారు. ఎంపీపీ ఇంటిపేరు కలిగేటి కావడం.. చిన్నారి పేరు తారక రామారావుగా పెట్టడంతో అక్కడే ఉన్న కొంత మంది పార్టీ శ్రేణలు కేటీఆర్‌ (కలిగేటి తారక రామారావు) అని చర్చించుకోవడంతో సందడి వాతావరణం నెలకొంది.