నోరూరించే భేల్‌పూరీ తినాలని ఉందా..అయితే ఇక్కడి వెళ్లండి..!

ఇది హర్షగోయెంగా సూచన

ముంబయి: ప్రముఖ వ్యాపారవేత్త హర్ష గోయెంకా నెటిజన్లను మెప్పించే సందేశాలు పోస్టు చేస్తుంటారు. ఈ వారాంతంలో స్ట్రీట్ ఫుడ్‌ గురించి చెప్పి, నోరూరించారు. ఈ భేల్‌పూరీ తినాలంటే కోల్‌కతా వెళ్లినప్పుడు ప్రయత్నించండని ట్వీట్ చేశారు.

‘భేల్‌పూరీ టోస్ట్ నాకిష్టమైన స్ట్రీట్ ఫుడ్. అన్నింటిలోకెల్లా  కోల్‌కతాలో తయారు చేసే ఆ చిరుతిండి రుచి అమోఘం. బ్రెడ్‌ ముక్కపై బంగాళదుంప, ఉల్లి, కొబ్బరి ముక్కలు, వేరుశెనగ, చింతపండు చట్నీ, చిల్లీ చట్నీ, భుజియా వేసుకొని తింటే దాని రుచే వేరు. మీరు కోల్‌కతా వెళ్తే తప్పక ప్రయత్నించండి’ అంటూ భేల్‌పూరీ విక్రయిస్తోన్న ఓ చిన్న స్టాల్‌ ఫొటోలను షేర్ చేశారు. 

దీని గురించి చెప్పగానే ఆహార ప్రియులకు వెంటనే నోరూరిపోయింది. కొందరు మేం ప్రయత్నిస్తాం అనగా.. మరికొందరు కోల్‌కతాలో ఆ ప్రాంతం ఎక్కడో చెప్పండంటూ హర్షను కోరారు. ఈ ట్వీట్‌పై పేటీఏం చీఫ్ విజయ్ శేఖర్ శర్మ కూడా స్పందించారు. ‘కొత్త రుచులు. నేను తప్పకుండా ప్రయత్నిస్తాను!’ అంటూ వ్యాఖ్యను జోడించారు. మరికొందరు ఇది ఏయే ప్రాంతాల్లో దొరుకుందో కూడా చెప్పారు.