‘విద్యుత్‌ బకాయిలపై త్వరలో విధాన నిర్ణయం’

తెలంగాణ సీఎస్‌ సోమేశ్‌ కుమార్‌

హైదరాబాద్‌: గ్రామ పంచాయతీలు, పురపాలికలు ప్రతి నెలా విధిగా విద్యుత్‌ బిల్లులు చెల్లించాలని తెలంగాణ సీఎస్‌ సోమేశ్‌ కుమార్‌ తెలిపారు. బిల్లులు చెల్లించకపోతే తీవ్రంగా పరిగణిస్తామన్నారు. సీఎం కేసీఆర్‌ ఆదేశాలతో ప్రభుత్వ కార్యాలయాల విద్యుత్ బిల్లుల చెల్లింపులపై డిస్కం, పురపాలిక, పంచాయతీ రాజ్‌ అధికారులతో సీఎస్‌ భేటీ అయ్యారు. ఈ సందర్భంగా సీఎస్‌ మాట్లాడుతూ ‘‘విద్యుత్‌ బకాయిల చెల్లింపులపై సీఎం త్వరలో విధాన నిర్ణయం తీసుకుంటారు. బకాయిలపై వారం రోజుల్లో డిస్కంలు సమగ్ర నివేదిక రూపొందించాలి. పని చేయని బోర్లు, విద్యుత్‌ బిల్లుల తేడాపై ఉమ్మడి బృందాలు ఏర్పాటు చేస్తాం. పూర్తిగా మీటర్ల రీడింగ్‌ ద్వారానే బిల్లులు వసూలు చేయాలి. మీటర్లు లేని చోట్ల నెల రోజుల్లో ఏర్పాటు చేయాలి’’అని సోమేశ్‌ కుమార్‌ అధికారులకు సూచించారు.